هناك ناس ماهو حي غير جسدها........

من طرف **زهرة اللوتس** 2012-02-24, 10:41 am

هناك ناس ........للشاعر عبدالجواد عقيلة
هناك ناس ماهو حي غير جسدها...........وهناك ناس ماتت صيتها خلدها
هناك نــــــــــــاس امـــــــــــــوات.............تحت اللحود وصيتهم ما مــــــــات
ناس هل مواقف عندهم بصمات..............ما ينتسي طول الحياة ومددهــــــا
وهناك ناس حية والضمير حياة.............وهذي هي اللي واجد اليوم عددهـــا
وهناك ناس تصبح ف الحياة وتبات........وتاكل وتشرب والدمـــــا مبردهـــــــا
وهناك ناس ما تعرف لها موجــات........تشوش وتصفي ف المجاز وحدهـــــا
وهناك ناس مرداها وجوة ابذات..........ان كان ريتهم نفسك يزيد نكدهــــــــــا
وهناك ناس ياساتر لها رايـــات...........ابيض م الغراب امقعدات اسعدهـــــــا
وهناك ناس حد البخل هم بالذات..........الواحد خذا ع المادة عابدهــــــــــــــــا
لاعمر زكي لا عطي حسنـــــات...........كنود ما شكر نعمة الله جا حدهــــــــــا
لكن ابواب الله مفتوحـــــــــات...........واللي قاسمة تاتيك في موعدهــــــــــا
سبحان قدرتة خالق المخلوقات..........اللي في الاجساد ارواحنا وجدهـــــــــــا
والوان ولغاوي الناس مختلفات.........وكل ناس من معدن حسب موردهــــــــا
وهناك ناس حية مالهاشي اصيات......وهناك صيت حايا ناس تحت الحدهــــــــا
وهناك ناس معدنها نقي نيــــــات.......كيف الحليب قلوبهم تاجدهـــــــــــــــــــــــا
هناك ناس ماهو حي غير جسدها.......وهناك ناس ماتت وصيتها خلدهــــــــــــا
هناك ناس صقـــــــــــــــــــــورة...........احياء بصيتهم حتي وهم في اقبــــــــورة
وهناك ناس حية وما عليها نورة.........وجوة عابسة والساهلة تعقدهـــــــــــــــا
وهناك ناس تفعل والقلوب غيورة.........ارباوة عصر للنفس من مولدهـــــــــــــا
وهناك ناس وان النايبـات صبورة........اصلاب الزمان بعزمها تقندهـــــــــــــــــا
وهناك ناس دوم بجيتك مسرورة..........لهم تنسجم ترتاح في مقعدهـــــــــــــــــا
وفية من سوي كي غيبة كي احضورة...اصفار علي اصفار اصفار من يفقدهـــا
وناس روسها يا ريتها مبتــــــورة........بياعة كرامة كل حد نا قدهــــــــــــــــــــا
اموات الضماير والنفوس غرورة........قليدهم ابليس افكارها سايدهــــــــــــــــا
خذوا البنادم غير لسم وصورة............انواع الرداوة صنفهم حوددهــــــــــــــــا
يجوا عند راسك يرسموا ثغبوره..........تفاصيلهم ع الحق يا مبعدهـــــــــــــــــا
م الفارغ ما ليين اجــــــــــرورة.........وفية ميط م اللي كلمتة بلـــــــــــــدهـــــا
وجميع ما يدير الحي بين اسطورة......التاريخ ما يرحم ولا يجحدهــــــــــــــــــــا
وراه الدهر للفناء سيــــــــــــــورة......ونتيجة ابذارك هي اللي تحصدهـــــــــــــا
خطرها الصيت وحيها وقبـــــــــورة.....وصاحبي اللي قصة احذاي جبدهــــــــــا
كلمات قلتن من خاطري وشعورة.......قليل من دسايس واجده جاحدهــــــــــــــا
يا من رزقت الحوت وسط بحورة.......طلبناك فرج بلغة مقصدهــــــــــــــــــــــــا
وصلاتي علية اللي هدانا نوره..........شفيعا غدا يوما يجي موعدهــــــــــــــــــا
هناك ناس ماهو حي غير جسدها......وهناك ناس ما تت صيتها خلدهــــــــــا