الوضع الليبيى : فِك المارشا ومافش داعي تعلق إندياترو

من طرف **dude333** 2012-04-12, 9:59 pm

فِك المارشا مجموعة من الخواطر تحكي عن الهموم الحالية للمواطن الليبي بطريقة ( هم يضحّك وهم يبكّي) ، ومعلش يسامحونا جماعة اللغة العربية لأن (فِك المارشا) ح تكون بالعامية لأنها زي الهدرزة بين اي اثنين ليبيين …

المره هذي نبو نحكو شويا عل (الطهقا) .. طهقا ابداها بالأحزاب .. كلها دارت أحزاب .. وطهقا بطاقات يدلدلن من خيوط على رقبة الشباب واللي تسألها يقولك (التجمع البيروقراطي الهيروغليفي الانشطاري الليبي المتطور الخ الخ) .. وبعدها طهقا التخوين .. تلقى اثنين يحكو يقولك .. من؟ هذكي؟ فكك منا راه إخواني .. ولا تلقاه ليبرالي .. باهي ياشاب شن معنى ليبرالي؟؟ مش عارف بس شكلها هكي مش كويس … معناها تعرف معنى إخواني؟؟ لالا حتى هيا مش عارف بس مش كويسه حتى هيا خوذ الشوور مني بس ..

وبعدها جت طهقا الندوات والمحاضرات .. صاح مش غلط الندوات والمحاضرات .. بس لما يكون هدفك ماشي تبي تسمع وتستفيد .. بس الطهقا لعبت دورها بعدين .. وقعدت كثرة الندوات والمحاضرات مكان للشباب بيش يطلّعو أحسن طرحه عندهم ويحطو نص كيلو جيل وهوووب شور الندوة ولا المحاضرة بلكي يطلع بشي رقم (مواطنة) من هنا ولا من هنا أيام ماكان الرصيد بلوشي ..

وبعدين وصلنا لطهقا الناس العارفة بالسياسة وفاهمة كل حاجه بس ماعندش وقت تدير أي حاجه فيها فايده .. ساد إنهم يقمعزو في القهاوي ويحرقو كرسيين أرقيله وهاك يا تهدريز عل السياسة وفلان سراق وعلان أزلام ـ خطرها أزلام جمع باهي شن مفردها؟؟ ـ ما علينا .. وهذك نيتا مش صافيا طامع في منصب لقدام .. باهي جميل ممتاز .. دوة وحدين خايفين عل البلاد جديات .. باهي انت شن قررت تدير من فايده بعد ماتكمل كرسي الأرقيله هذا؟ تبدا في الكرسي اللاخر؟؟ باهي مية المية خليك في الأرقيله ..

وتوا جينا لقصة الانتخابات وكيف تم اكتشاف أن الشعب الليبي عارف كل كبيرة وصغيرة في الانتخابات وكلها مطلعة أنياب وتقطع في بعضها وتخون في بعضها .. ياجماعة بالله فكو المارشا شويا ودرّس عل اليمين وفكـّر شويا .. دوبينا فيه ناس ماتاخدش منهم خاطي الدوه وحرق كراسي أرقيله ونحنا موخّرين .. بس دوبينا فيه ناس زيكم تقرا مواضيع بخصوص ليبيا ومصلحتها معناها نحنا بخير .. وفكّ المارشا بالله عليك مره مره ومافش داعي تعلق إندياترو…

محمد بن سليم
9/4/2012

من طرف عبدالله النيهوم 2012-04-12, 10:05 pm

هههههههههههههههههههههه
منور والله
كلام في الصميم

من طرف homeland 2012-04-12, 10:10 pm

ياجماعة بالله فكو المارشا شويا ودرّس عل اليمين وفكـّر شويا
بصراحة هذا ما يحدث فى ليبيا ...والله حال ايبكى ويضحك..
ربى ايفرج علينا وخلاص...
بارك الله فيك استاذ dude333... الوضع الليبيى : فِك المارشا ومافش داعي تعلق إندياترو 492686