32 غناوه علي العين

1/العين وفراغ العقل ملاهن عزيز كلهن
2/زهيت يا جديد العين ندعى الله ما يجيب الخطا
3/حسايف العين كبار تنظر قديمين فى ايدين غيرها
4/هنيه اتبات العين ان كان صوب لولاف كملت
5/يا العين نا وياك لنا الله ما دام ما قسم
6/العين حالمه منام تفسير زها عمر مو ناظره
7/فرقاهم اعزاز صحيح ياالعين مو منامات خترفه
8/اصحاب الغلا يا العين نصيب غيرنا فيهم قوى
9/الله والنبى يا العين انسى سريب لولاف خيرلك
10/اللى يقولك يا عين انسى عزيز مو صاحب عدو
11/ان تهايا تسيل العين صبرها كملت
12/انتى ضاله يا العين بعد ثمان ياسات طامعه
13/بكت العين قال العقل انحنا قلال والى كلنا
14/تخطيرى لهم يا العين تهوين مو غلا فى بكيتك
15/تدير عيبها عالعين وتقول هى اللى حاست على
16/ترجى العين خامس ياس ترقيع فى غلا بايد لها
17/تريدك العين ربيع تزها بك طول عمرها
18/خليت يا العزيز العين غريبه مع واشونها
19/خلك من كلام الناس مع عزيز يا العين والفى
20/شاوى عليك الدمع ولا عزيز يا العين ناسيه
21/شدى عزايمك ياالعين يفنى العمر يابال الغلا
22/طعمه عمرنا ياالعين هلبت فى مرجاتنا لهم
23/ع العين خاطره وسمرت سهرايه غلانا لولى
24/عازيت ما نريد العين ترتزى فيه وارتزت
25/عزيز جا اصداف العين رعشت ما حوتك هدت
26/عزيز يا العين وراح اقضى العمر موجى بعلتك
27/عليهم شوى ياالعين بكيه اليوم والعام والشهر
28/العين فى ديار عزيز تندب تقول خلينى شوى
29/العين ما تريد دليل دودش غلاها بيدها
30/فزع العين غير ادموع على عزيز ما يوم طالبت
31/مازال واجعك يا العين فرقاهم اللى ماله سبب
32/ما من اللى يا عين قاطع لواك خاطى غيبته

انشالله يعجبنكم واللى يعرف ايزيدن

العين حالمه بثعلب ....على بونوانى خايفه
امعاك ياعزيز الله..... يرعاك نين عينى تنظرك

بوفرقه كتب:العين حالمه بثعلب ....على بونوانى خايفه
امعاك ياعزيز الله..... يرعاك نين عينى تنظرك

تشكر يابوفرقه

العين من غلاك اتريد \تقسم عليك حتى عمرها
مشكور يابوبكر حنتوش علي الافاده
تحياتي \\\\\\\\\\\\\\\\\حسين 2

العين كل نهار اتقول & اجعل نصيبنا فيهم قوي
مع تحياتي

دمع العين أبروحه ماطر \\\ يا بال ألي غايب خاطر

بكيتي وما طلتيه * علي عزيز ياعين سادك

5/يا العين نا وياك لنا الله ما دام ما قسم مبدع ولك تحياتي

ناعيني ويش اينسيه كين نويت اتغياب عليه

العين ياعزيز عليك أكثر حنينها طار نومنا مع تحيات الورفلى

انسيهم اتقول انظري .... الها انقلت عيني اتقولي
مشكور ابوبكر

شد عندك العين حايسه مالعصر ازعما بيش ياليل جايها الورفلى

بكوا العين ساعة فجر لاهناك دوج لا وين تلتجى الورفلى

ان نامت يجى للعين ... ملك يقول لولاف وينهم
ترجي العين تاسع ياس... ترقيع في غلا بايد لها.

عقلى قال عزيز انسيب....عينى قالت تبقى طيب.

مانبى ياعين نصايح شور عزيز بكبدى طايح

عينى قالتلى فى وذنى .................. شور اديار غالي ياخذنى

تستنس اتروق العين ..................... اعزاز وين عليها ينشدو

شكراً لك على هذا الاطراء الاكثر من رائع

بكيتي وما طلتيه * علي عزيز ياعين سادك

العين حالفه للعقل ...... انطيعك الا في نسوهم

اوحلت في ظلال العين ......نذراء اتقوالي اهماااااااااا
تساقط ادموع العين ...... وين يا قديمين تخطروا
متباعد طليب العين .......ما القينا دواء يا جروحنا
************
نا والعين عليما درنا .....تنساهم مابت تخزرنا
عيني ما نقدر ننههاء ....في اوقات انعوز ابكاها
راكي ياعيني اتجريني ....نمشي للي ما يبني
الملكه

خطيتا الها واندمت @ للعين دار فالصوب راكحة
عزيز لو دناه ايسير @ ماعاد العين تبكي ابغيضها
خاطي قديم نا والعين @ مالقينا مشاكي يممنوعن

تجميع سليمان الخفيفي
العين ماجديد اعمدت ... لوكان لاقية خير فالقدم
"شالت فيك العين نظرها..يامرهون اجبر خاطرها"
تلذيع القديم اقهرك ....... اندرتى جديد يالعين شاورى
واجد العين انظرت ...... فلعمر مابكت غير عالقدم
قديم يالعين اظلمك ..... اوبسكابك ظلمتى خاطرى
مع تحيات طيب ليبيا