لما يطلع أمين العدل .. ويقول مافش عدل ..

من طرف محمد اللافي 2012-05-30, 1:25 am

لما يطلع أمين العدل .. ويقول مافش عدل ..

ارضى بنصيبك .. وذلّك .. وامتهانك ..
ارضى بالفتات .. وأيام انتظارك ..
انسى شهدائك .. وفقدائك .. ومعاناتك ..
وخليك زي ما انتا ..
يا مواطن يا صالح ..

;

لما تبكي أم من القهر ..

لما حال الفقر يتبدل .. ويتغير .. وبرضو يقعد فقر ..
وتنزّل شهيدك ..
ويتسكر قبر .. ورا قبر ..
ويطلع حفار القبور فالح ..

;

لما تراجع شريط ثورة ..

لفوا عليها الكلاب ..
لفوا عليها الذئاب ..
والي متهني .. قعد متهني ..
وانتا تاكل في الملح .. والمالح ..

;

سكّر كتاب الأمل .. واكفر ..

بالثورة .. والثوار ..
ونعيق الغربان .. الي بدلت ريشها ..
اكفر بفبراير ..
وبيوم أغبر ضحكت فيه على نفسك وقلت “ليبيا حرة” ..
ونسيت أن ليبيا .. بلاد القهاير ..
وأن الي عالكراسي مش ساسة .. مش وطنين ..
هما ضراير .. في ضراير ..
منين حيجيبوا السياسة .. عليش حيجيبوا العدل ..
العدل للخائن .. للطالح ..
أما انتا .. مواطن مسالم ..
مواطن بدرجة رابعة ..
مواطن صالح .. صالح ..

;

;

أحمد بن موسى

اه اه اه يا القهر لما يطلع أمين العدل .. ويقول مافش عدل .. 554822_357963620923673_448979919_n