.. يْــحَــوْدِد غَيْظَـه .. الشاعر مراد البرعصى

يْــحَــوْدِد غَـيـْظــَه
للشاعر :مراد البرعصي
==================================



يحَوْدِد غَيْظَه ... ساعة عَلَيْ ساعة بْكا وجضِيضَه ... عليه خاطري ما با يحَوْدِد غَيْظَه




يزِيد زيادة ... اطَّاوَل شقا عقلي وباب نكاده
فرْقا حزام الجِّيد بِيض عَضَاده ... مْحَرِّم عَلي عيني هَنا التّغْمِيضَة
منْهل العِدّ اللي قْلال أَوْرَاده ... تَبْقَى بدَمْع تفِيض كَي تفْوِيضَه



يحَوْدِد هَمّه ... معَ كلّ جِيهة جايته ملْتَمّة
رمَّة وراء رمَّة وراها رمَّة ... أَصْناف المشاكل جايّات قفِيضَة
واِن دار الغَلا عقلي الياس يشمّه ... اِن كان هُو مسَى يصْبح خَراب ربِيضَه


يدِير م راجل يعجبكوَّة ... وينْسَى غَلا اللي خان ياخذ سَوَّه
بْكانا عَلَي مَول الغَثِيث مْلَوَّى ... تَوْجَع الخاطر كَي نقُول قرِيضَة
ومازال دامي جَرحّم لا جَوَّى ... عَلَي كلّ تِيقة مخْتلِف تقْضِيضَه


يهُوْن سرِيبه ... وَين ما غَفَت عيني العقل يجِيبه
عَزِيز دار لي موجع صْعِب تطْبِيبه ... لا له فقِيه ولَو دوا تشْظِيظَه
حْمُول كَيدهم شايِل قنَى وصلِيبة ... وحَيلي برَد ما عاد فيّ نهِيضَة


يْدِير عَزايم ... ولا بَيْت ناخذ فيه لوْمة لايم
رقِيق الشّفايف خَزر عَين الحايِم ... فارِض عَلَي رُوحي غَلاه فرِيضَة
دِيما مْفَيت عليه نطْوِي صايِم ... بْطُول الزّمان ودنيْته العَرِيضة


يحَوْدِد باس ... الخاطر يخَمّم محْتزم منْهاس
من حاشاً جفَى مَول الغَثِيث اَكْداس ... تَمّت العين تزَّفْزَف تقُول مرِيضَة
قلبه عَلَيّ أَسْوَد تقُول اكْباس ... حَتَّى كَي نهَيْته كادني ترْيِيْضَه


بْطُول أَيّامه ... يذْرِف عَلى اللي لاطَّات أَقْسامه
يا بُو غَثِيث تقُول رِيش نعامة ... مَدْعاك انت حافظْته العَين حَفِيظة
كَلِّي العقل ما عندَك عليه ملامة ... عَطِيب هُوه من غادِي وعاب حْوَيْضَه


يحَوْدِد ياسه ... تخاطَن أَرْيا ناسي ورَغْبة ناسه
ملْتاث خاطري دِيما عَلَي مجْلاسه ... عيون من جزَى في صَيف واعِر قَيظَه
مَول الخَجَل فَوق الحزام تكاصَى ... دايِر زداوِي ساعة التّنْقِيضة


العقل يدِير ... عَزايم وينْساهم بلا تفْكِير
واِن كان قلت يا عيني انْسَيْهم خَير ... تبْقَى تقُول تذُوق في حمَّيضَة
اِلاَّ خاطري منّه جمِيل كبِير ... اِن كان بالشّهادة طلت في تُوقِيظَه

تحياتى للجميع

بارك الله فيك

بوالفرايس كتب:بارك الله فيك

مشكور بوالفرايس..

مشكور يا بو جار

"يدِير م راجل يعجبكوَّة ... وينْسَى غَلا اللي خان ياخذ سَوَّه "
الشطر الأول من هذا البيت غير واضح .. نرجو التوضيح

مشكوراخى الكريم على هذه المشاركه الرائعه

شكراً لك على هذا الاطراء الاكثر من رائع