مازالت راني حي .....شعر شعبي

مازالت راني حي


اتصدق...؟
برغم الغياب
وليل طويل ما كمل
وآهات و ا سمور وعذاب
وعقل يدوي ما ايمل
في بين بينه في خفاء
يرحل ايجيب ايلم
يحكي حكايه يسرد علل



وهدب وين ينشف ايجف
ايترع الدمع ايجم
به المواقي تمتلى
يحرق احداق العين
ينزل حذايف يجرح الخد
ويروي اطراف الكم




وطيف ساكن في العيون
وين ما الظلام ايحوش
وعتمة الليل اتعم
ايداعب حنايا الخاطر
ويرحل النبض ايسافر شوق وحنين ايجر



وقلب خفقاته حسايف
وجرح جوا جرح وين اندمل
ناضن اجراح اخرات
سطر سطير الجرح
نطف نزف ترع الدم



ومركب دليله راح توارا غاب المنار
ودر مساره تاه في ابحور السراب
مجدافه تكسر وساريه ممزوق الشراع
والربان حاير في المسافه
ونجم الدليل توارى وغاب الثريا ضاع




اتصدق...؟
مازالت نعرف نخبر
ومازالت نقدر ع المصاعب نصبر
لوحة الساري نجبر
ننشر اشراعي
للمواني نعبر
أتصدق...؟
مازال عندي امل
مازالت قاعد حي...




اتصدق......؟
برغم الشقاء
ورغم الجفاء والموح
وكسرة الخاطر والعناء والأنكسار في الروح
وجرح ينزف في خفاء
وبرغم الآنين والنوح
مازال عندي أمل
مازالت نا الخل الوفي
ومازالت قاعد حي ...



وتصدق...؟
لوتصدق تلقاني الغيمه الماطره
السيره النقيه العاطره
طبعي حناني في ومازالت قاعد حي...


اتصدق ...؟
مازال نبعي صافي ومازال حضني دافي
ومازال حوضي بالحنان اذرافي
ومازالت نا الود النقي
مازال عهدي وافي
مازالت قاعد حي...!!!




يا ريتك أتصدق ...
وتصدقني وتصدق
صحيح واصلني كلام
وشارب طواسي مر
من ظيم هجرك من جفاك
في خاطري شايل ملام
مطعون طعنة غدر
من ظلم ظلمك من خطاك
مكسور منقند مجروح
ما يقدر طبيب علي
بس........!!!
مازالت قاعد حي...!!!





اتصدق...؟
بالرغم انك بعت
وهنت الغلاء ضيعت
مايوم عمري هنتك
شريتك و عمري بعت
والحب ما ضيعت
برغم الخيال الشارد
وغربة ورحيل وصد
ونبض صادر وارد
وشوق فاض وزاد في ليل قاتم بارد
مازالت ما نجرح دواء
ومازالت شيال العناء
ومازالت نا هو نا



واتصدق ...؟
مازالت عاشم فيك اتحن علي اتجي


أرجو أن يكون عجبكم ....


للشاعر حميد الذيب

حلوووووووووووووووووووووووو هلبة

هي جميلة من جمال....

وتعبر عن الحال.......

وتعبر عن الشاعر...وأكيد عن أحاسيس الناقل

شكراً على الاختيار!!!

تعليقى للمرة الثانية
جمال ...... اقول لك ان من كتب القصيدة له خبرة واسعة باملاحة الفلكية والملاحة الساحلية
شكرا لمن كتب
والف شكر لمن نقل

مشكــــــــــــــ وبارك الله فيك ــــــــــــور