هن اللي جنك..بدلتهن بالغير كله منك

هن اللي جنك..بدلتهن بالغير كله منك
ما جيتهن بالعكس
هن اللي غالن...ولا لغير زولك والفن لا مالن
بدلتهن بالغير عنك شالن...معاك الإذن عدي أتقول ما شافنّك
ماك خير منهن عالغلا ما سالن...وين بعت باعن والجفى قرنّك
ما يرخصن في يوم هكي قالن...بيناتكم!! حـلـفـن ومـايبـنّــك
تحساب ينزل قدرهن لو والن...لا لا وحياتك راه خايب ظنّك

هن اللي جنك..بدلتهن بالغير كله منك
ما جيتهن بالعكس

هن اللي حبّن...وهن اللي هنك منك بعيد انطبّن
وهن اللي الوجيعه عالعباد يخبّن...طفح كيلهن هاهن اليوم جفنّك
الله لا يرده جرح غاير تبّن...عليه وعليك بغلهن ركنّنك
الانضار يا قديم الصوب واجد عبّن...من كاس مرّك جربن يسقنّك
اشرب هنيئاً صحتين تغبّن...يا اللي جفيت اليوووم راجع كنّك
نسايم غلاي ان كان شور هبّن...خوذ الذرا مايفيد راهو حنّك
شطّبت عالماضي ايامه دبّن...عني أرياح العون جن شالنّك

هن اللي جنك..بدلتهن بالغير كله منك
ما جيتهن بالعكس

هن اللي طاحن...وهن اللي فمدارك من أفعالك راحن
وهن اللي فيافي موحشات اجتاحن...لاجل بروحك ما يبن يرخنّك
ووينما جيوبي من القروش اشحاحن...صغرن فعينك سبتني سابنّك
نهاية اللعبه واضحه وما ناحن...عليك يا عزيز الأمس كي سمنّك
واليوم مربوحه بعيد ازّاحن...أوهامك علي كي بعت ما همنّك