نــفاق في نفــاق من غير ما نسمع أي شئ يوحدنا و يجمعنا ..

من طرف عبدالله النيهوم 2013-01-06, 11:19 am

نــفاق في نفــاق
من غير ما نسمع أي شئ يوحدنا و يجمعنا ..
والذي جمعنا هو كرهنا لمعمر القذافي فقط

ناس ماعندها روح مع النفاق و الخــداع .. الا من رحم ربى ..
الكل يدير في روحه ثــوري .. يدير في روحه مافيش منه ..
تكلمه يقولك الطاغية المقبور ..
أنا عمي محبوس في بوسليم .. أنا خالي في الجبهة أنصاب ..
تفتح التلفزيون .. ماتسمعش غير كلمة نظام المقبور 42 سنة ..
حتي لو قلت النظام السابق ...
يوقفوك و يقولولك .. اللانظام السابق للمقبور ..
البلاد خــاشة بـعضها .. خنبة سرقة .. ميليشيات .. كل شئ زي الزفت ..
و هما قاعدين يغنو علي الطاغية و المقبور ..
الوزير اللي يجيبوه .. المسئول اللي يجيبوه .. بيسألوه علي شن قدم و شن دار ..
يقعد ساعة يهدرز علي اللانظام السابق في عهد الطاغية و المخلفات التي سببها .. الخ
و كأنها أصبحت فـزاعة فشل أي وزارة أي مسئولية .. دفها في راس اللانظام السابق ..
مــع شوية بهارات و فلفل ..
و كتر من قولة الطاغية المقبور أبن اليهودية .. و المقبور ابن اليهودية
تعمد تدمير الوزارة الفلانية .. الخ
فا يحصدقوك و تمشي أمورك و تصبح وزير ناجح

العالم كله يسمي في الطواغي بمسياتها :

موسيليني اللي شنقه شعبه .. و اللي قتل قريب ربع مليون ايطالي ..
يقولوله موسيليني
فـــرعون .. قاعد أسمه فــرعون اللي حــارب الرسل و طغي
نابليون أسمه نابليون
هتلر اللي قتل مليون شخص ..
اسمه هتلر ..
ولا تسمع حــد يقول الطاغية المقبور السفاح هتلر
إلا أحنا .. لازم تقول الطاغية .. تــعبير عن حبك لفبراير ..
نــفاق في نفــاق
أيضا من أكبر علامات النفاق ..:
أن جــميع من يدعي أنه من الثوار .. لما يتلاقو و يهدرزو ..
يقولو ليبيا خشت في حيط ..
خنبة سرقة .. فساد .. واسطة ..
مافيش جيش .. حرب قبلية .. الخ
لكن بمجرد ما حد تاني غريب . أو يعرفوه أنه طحلوب .. يغيرو الدسكة ..
علي أساس أنها ثورة ملائكية و احنا ماشيين في الطريق الصحيح ..
و الثورة الفرنسية خدت 10 سنوات ..
و تحملنا 42 سنة ما نتحملوش 5 سنين ..
و هذا شئ طبيعي بعد أي ثورة .. الخ
و أنا أولهم ندير فيه الجو هــذا .. لما نلقي طحلوب ..
نغير الدسكه على طول لانهم مش تريس
هــي الثورة صـحيحة ..
الي يوم 20\10\2011
بمجرد مقتل القذافي ..
و بعدها بأسبوع .. أفــراح و أعراس و الشعب فرحان ..
لكن بعدها شــد نفسك .. طلعت قصة قطر .. وطلعو الأخوان ..
وطلعو السلفية و العلمانية ..
و أنقسم الشارع الليبي علي 60 طريق ..
و مــعادش أصبح في أي شئ يوحدنا و يجمعنا ..
و أكتشفت أن التلاحم و الحب و الفزعة اللي كـانت بينا ..
ليست بسبب حبنا و خوفنا علي بعض ..
لا
بل الذي جمعنا هو كرهنا لمعمر القذافي ..
الكل تهمش من القذافي ,. الكل تعرض للظلم ..
هــذا هو الرابط المشترك الذي جمعنا لأسقاطه
.. أم الأن ..
فكل يغني علي ليلاه .. و الكل لديه أجندات ..