ان جاك العيب خليك حمال و راه العيب ماهو للمزابا

من طرف **العاشق الصغير** 2013-03-20, 12:52 am

ان جاك العيب خليك حمال
و راه العيب ماهو للمزابا
اللومه يقولوا راه عالعقال
و العقل بالعقل يمسك اصحابا
اللي تنفعك وسعت البال
و اللي هضا فعله ابقابا
... و لا ترافق عطيب الرجال
يذايل ان كان هو تنابا
و ارعى بداك من رفقت انذال
رفقيت العطيبه تلحقها عطابا
ايدنيك الرفيق مرات للظلال
و تسلك ادروب كي ريش الغرابا
انكان رفيقك من اولاد اهلال
له اطامن سليم الوجابا
و لا تغربك روقت احوال
مرات عالغفال تاخذك نقلابا
و لا يضيق بالك عين غربال
انكان الزمان وراك العجابا
و لا تروع و تقول موحال
كل شي من الله اسبابا
و لا توجعك لو الوقت مال
هذي الدنيا و اسمها قلابا
ما يغرك سماح و جمال
الها وجه شين و سكابا
و كل حال ايل للزوال
و فعلك ينفعك يوم الحسابا
و عالظلم اصبر صبر لجمال
طعمة الرب ايقولوا عقابا
و لو ظلمك قريب و عقال
علي الله خلي ديمه احسابا
صيور الظلم لو كان طال
طلوع الشمس اتجلي ضبابا
و ان لك قو من قوة اجبال
صيور العمر ايحودد شبابا
و ان جاك الفقير يمناك سال
دير وقيه فالقبر و عذابا
و لزم صلاتك دوج و مخال
و زكاة مالك اظهر انصابا
و خلي ارحامك ديمه اوصال
و عالجار انشد و دق بابا
و لا تنقص ان كان مكيال
و ترحيبتك خلي للضيف شرهابا
و بالميجود الجود ينقال
ترطب قلوب راهي الرجابا
و راه الصيت معلوق بالافعال
و كل حد ينطرى باكسابا
و خطا القول من القيل و القال
مرات السكات خيرلك ثوابا
و خلي حديثك دوم بالامثال
هضاك هو اللي ينمي اترابا
ياعقل خليك دثمار شيال
مافيه خير اللي هلب شيابا
الوصيه راه تنشرى بالجمال
هذي وصيتي عالزمان و غرابا
وصلي عاللي طيب الفال
محمد نبينا الطيب انسابا
م ن ق و ل