قصيدة : الصقر

الشاعر روفه الدعبوب الرفادي
قصيدة : الصقر

أخـذو الصقر غادي لبّسوه اكمامه ***خطر علي أميام كيف أميامه


غــمّ أعــيـونـه ***ولا تـعــال احـــذاه و اقـعــد دونــه

المهم تبقي خزرته مركونه ***لانريد وجهه ولانريـد اصـدامــه

حرّك اللي كـانت خفا مدفونه ***ونقّض الجرح اللي صعيـب إليامـه

لـبّـسه كـمـبـيله ***واسوال الـنبـي تــالاي لا تجلّـيـلـه

فيه النظر ماعد انريـد انشيله ***خطّر عليّ اعـيـون سمح ابسامـه

اذكّرت ماضي مـن سنين طويلة ***سحبنى وراه ورحت في دوامه

اياماً و وقته خاطري زاهـيله ***ورايــق بـصفـو الـحـب وانسـجـامـه

مع بنت شوعة وجيلها من جيله ***قريـبة الدمّ ومن بـنات عـمـامـه

اعيونها غني مولاي ع التكحـيله ***دفيـنه خذو منتوجها فـحـامــه

إن هفّت عليـه العـقل يـطول ليله ***ويبقي كما عيّل جديد افـطـامـه

سايق عليك اللي فزع لحسيله ***فارس سعيده اللي شهير مقامه

فينا جـميل ونقبلوه جميـله ***الصاحب ايشيل الطير مــن قدامه


اعـــيـــونـــه واري ***وحـذاي لا تجلّيله إن ريـت حباري

مكبوس خير مايحوّس عليّ افكار ***ويظهر علل داير عليه كتامه

اتقول في متشمّت بطول جضار ***ينزّال الديار العـوج طــال مـرامه

داي من اعيون وجن اعيونه اصدار ***يزقّـيت لاي عيبه ولاي حشامه

تزقاية اللي مغشوش غفّه شاري***على اثر الندم حطت عليه غرامه

تزقاية اللي فالدين عالم قاري ***عليه امحرمه حلّه ابليس اصيامه

تزقـاية غزال آنس لدول بكاري ***ختّاله مع تلت النياق تحامى

تزقاية طليب مع وجوه غثاري ***قدّام من ايسال ونقّله ب اجرامه

تزقاية غريبه نجع جاها طاري ***وحيدة ولد سلّت البيت ارمامه

تزقاية اللي فالدمّ سمّه جاري ***وبكبده علي وجه الوطا ايترامى

ولا هروب ينفع من امقدّر جاري ***ولا أتفيد في ارادة الله ندامه

ارحمني اعيون الصقر عنّي واري ***ملسوع المجاحر مايجي لعدامه


شيله علي القفازه ***و خلّى امكمّم فوق من مركازه

دلال م الرفاقة عارفين انقازه ***مفتاحه اميامي سود باب كلامه

طربهم ان جرّ العود قال اعزازه ***ان طاب الغلا دارو عليه اكلامه

ايبانن افعال العما في عكازه ***بروحه نصب فخّه وطاه بقدامه

ومـانا من اللي لوسطهم هزازه ***علي لحن غربي يرقصوا لانغامه

انشيلو الكفّ وللغني طربازه ***وشتّايه إن جا رادح جديد احرامه

ولفا للخلا برواحنا قحّازه ***اهروب من مشاكل واجدات و ياما

ونزهه اللي منّا يطول اجازه ***طلع علي وادي المرى ووهامه

وشوحة السدادة بقزّها تقّازه ***وعلي ضيفنا وقتاً لفا عزّامه

و إن قابل بلَط نَثله تقول قزازه ***وحطّ العصايب فوق روس ارسامه

بين الديور لدارنا هندازه ***منازل اتحوّل ع القلوب غمامه

وفوحه نشاشيحه مع قرقازه ***تسحر الروح مع هبوب انسامه

وبكروزر هميل الهود له لكازه ***ودياره علل القناص به خطامه

وجدي الغزال وهو اشواته طازه ***سايل بها ديمـه الريق اجمامه

و بجلّ وجدارى نارنا وزّازه ***وهواره بها نوّر الخلو ظلامه

وان كان صار شيل وحطّ له رزازة ***ومانا عليه امرومين اروامه

كمّين غرد يسفا شاقين اكوازه ***ايلين اللي ماهن ارقاق عزامه

ونخرّموه بالجوزه وبالحجازه ***وبسهيل وينما جديه اغبي في غيامه

و نردوا معاطينه اوقات اكرزازه ***اشباه بالقطا وقتاً القبلي غامه

بـوادي شوامس امطرّزين اطرازه ***علي كل غافي عـندنا نخرامه

خطّرها الا جور الزمان بعازه ***و رضاي بقضاه وطوعتي لاحكامه

و إن طال العلَل ماني اللي قلقازه ***انفصّل الثوب ونبخصه بكمامه

لاهو قداه العيب لا يجّازى ***الصقر من الذهب مدقوق رمز شهامة

خذنّي عيونه وين حقّ محازة ***وعدّى لها من الارض عِلوه قامة

وسيب اللي في الارض صدره وازى ***ورا خارمه رقّ الجناح تعامى

بزّاره عليه الغـيم دونه حازة ***وحاحا وراه و له اسماح انغامه

و روّح بها ودمومها نزّازه ***وسيده تبسّم لتوقته بسلامة

سالم الجناح ودوب له نهزازه ***مظلّي وعنده فالوطاه علامة

و أركَز و هاواله وجا بمجازه ***سبحان كي هداه وعلّمه علاّمة

مكتوب غير من عينه انحك حزازه**حسوفة على غالي مشى بحلامه

عشّي الطير و خلّها تتوازه ***انكان فالرفق عندي عليك ملامة

و ان كان تمّ تجلايك احذاي عَطَازة*إعزل لي ونجلى وكلّ حدّ بقسامه


اخـذو الصقر غادي لبسوه اكمامه خطر على أميام كيف أميامه

تسلم اخى عبدالحفيظ