اليوم ليبيا خشت صحيح فـ حيط.....ماسدّها زيدان جابوا اقطيط

الشاعرة رياح مصراتية بعد القصيدة السابقة التي هجت فيها حسن الامين
ها هي تعود اليوم بقصيدة جديدة على المدعو عبدالباسط القطيط المرشح لرئاسة الوزراء تحاكي بها الواقع وتقول ::


اليوم ليبيا خشت صحيح فـ حيط.....ماسدّها زيدان جابوا اقطيط
ماسدّها الالماني
من سويسرا جابوا نموذج تاني
تخطيط براني علي براني
يلعن البراني وبو التخطيط

نبّوه ليبي كيفنا ويعاني
حوشه امرقّع والسقف طرنيط
ويا ريت عايش صغرته فـ سواني
ولاعب "وبيس" و "بطش " و "تزربيط"
وجاري فـ عاشورا ورا شيشباني
والقراية تمّها يادوب بالتلقيط
وراكب فـ عكاري مع سوداني
وعايش حياته كدّ وتمرميط
نبّوه حاسّ بوقفة الشيباني
فـ طابور خبزة والصقع مشليط
البازين واكل باللحم الضاني
وعشاه خبزة مغمسة بالزيت

مش واحد امنعّم وجوّه هاني
يفطر بكورن فليكس وخلابيط
شوكة وسكينة وزوز صواني
يلقى غداه فـ غاية التزبيط
فراشه حرير وملبسه طلياني
واللسان عاقد بيه عقدة خيط
وأكبر مصيبة امناسب العبراني
خوال البنية ليعازر وشاليط
يبّوه يحكم واجهة بلعاني
وعند النسابة الحل والتربيط

يكفي خطط وتكتكة شيطاني
ليبيا غلاها الدم شايط شيط
نبّو اللي حبه لليبيا حقاني
صافي نقي مايدخله تخليط
مش دبل شفرة وتغطية امريكاني
نبّوه ليبيــــااااانا وساااااااد م التفريط

اليوم ليبيا خشت صحيح فـ حيط.......ماسدّها زيدان جابوا اقطيط
.
.
.
.
رياح مصراتية 6/12/2012

ماشي  الحال ليبيا شياله الهم ...............شكرا