ياصبر وين نلقاك الجزء الثاني

من طرف الاسطوره الجمعة 30 أبريل 2010, 1:56 pm

ياصبر وين نلقاك( الشاعرعبدالحميد السنوسي)
يا صبر وين نلقاك..............وعليك أيش الدلايل
ويا صبر كيف نقناك..........وتخفف على العلايل
ويا صبر طال مرجاك.........والهم فى القلب عايل
يا صبر أيش بطًاك...........أنظر أدموعى سوايل
يا صبر أقرب وهاك..........بنادم دلنًه علايل
يا صبر القلب ناداك.........بروحه شايل الهواي
يا صبر طالب أحماك.........دايلينه أشيان الفعايل
يا صبر صبًره أمعاك..........كثرن سوايا العوايل
يا صبر أل همً مهلاك.......والضيم جلاب الرزايل
يا صبر ضعنا أحذاك..........دالوا علينا الوذايل
يا صبر تعلام الهلاك........فى أل قلً وحظ مايل
يا صبر نحسابك رفيق......ونحسابها أتشطك أجروحى
يا صبر فى نص الطريق.....خلليتنى نمشى أبروحى
يا صبر خشًيت بى الغريق....سيبتنى ساعة جنوحى
ناديت فى لحظة الضيق....وين جفً العسل من أجبوحى
وين النحل هج م الصناديق......ويبست مراعى أسروحى
هناك باع الصديق الصديق.....وقدام الكدر ذبلت أفروحى
كنت دايرك ليًا صديق.....وكنت حاسبك كيف روحى
وكنت عوزتى والشقيق.....ما نحسبك ترضاه نوحى
غرًيت بى وان الحريق.......كى شبً ودمًر طموحى
حتى وانت مرً فى الرًيق.....صابر على مرًك وموحى