حوار بين جيل وجيل ..حفيد وجده

من طرف رؤوف عوض الجبالي 2011-01-10, 9:20 pm

يدخل الشايب وقد ناهز عمره الثمانون سنة أو يزيد قليلا إلى المنزل يجر جسده المتهالك محدثا صوتا (( يتحنحن )) وهذه عادة يفعلها معظم شيابنا للإعلان عن دخولهم البيت وهي من العادات الحميدة التي باتت لا تعني شي بالنسبة لهذا الجيل ليجد حفيده يجلس أمام الحاسب الآلي ، ويبدءا الحوار بعد أن ألقى الشايب التحية على حفيده:
السلام عليكم
أيه ياوليدي وانت ديما مقعمز قدام ها التلفزيون.
لا ياجدي هذا مش تلفزيون هذا كمبيوتر
وعلى شنو تفرج في الي سميته هذا ياوليدي
انا ياجدي مش نتفرج انا نقرا مش كنتم انتم زمان تمشوا للمؤتمرات الشعبية باش تناقشوا وتقرروا حنا توا عندنا النت نناقش ونكتب بحرية .
ماتقولهاش ياوليدي حق هالكلام الي تقول فيه
ايوه ياجدي وانا توا نقرا على القطط السمان.
يضحك الجد ايه تقرا على القطاطيس ياولدي.
ولاش ياوليدي تعب في عيونك وراسك انا جدك نعرف هلبه على القطاطيس وهات وذنك واسمعني
اسمع ياولدي على ذكر القطاطيس ترى بالله عليك تقول لحنك راهو القطوس ياكل الدجاجات ويقعد جدك بلا دحي ودحيكم توا ماناكلش فيه مغشوش ياولدي.
انردو توا للقطاطيس اسمع القطاطيس هذا ياولدي فيهم انواع واشكال فيه قطاطيس اسمان وقطاطيس شبعانه واتيين باش حتى هم يسمنوا وقطاطيس عايشه عالفضله وفيه قطاطيس قاعده في حالها.
وفيه ياولدي قطاطيس ماسكة السربيس
ياجدي كلمة السربيس من وين جبتها
عندك حق ياولدي هذي كلمة طليانية معناها ماسك الدور ماهو جدك ياولدي خدم مع الطليان ريت ياولدي الزيتون الي تقول مسطر تسطير هذا جدودك غرسوه بالعصا والطلياني واقف عليهم لكن ياوليدي الحق ينقال وانا في عقاب عمري كان الطلياني عقاب العشية يعطينا قريشتنا على دائر المليم مش زيك انت تخدم في الشركة وماخلصوكش شهرين لو كان مش نساعد فيك من معاشي الضماني راك تاخذت.
ما علينا خلي انعاودو للقطاطيس
ادعي ياوليدي انشاء الله غير ماتبدوش كلكم قطاطيس وما تلقوا ما تاكلوا واتردو على بعضكم.
ترى بالله ياوليدي قول لحنك اتجيب البريق والكروانه حس العصر يذن خلي نعطوا حق ربي.
ورد بالك ياوليدي تكتب هالكلام في هالتلفزيون هذا جدك شيباني يخرف
ورد بالك ياوليدي يطلعلك قطوس مسقط من هالتلفزيون......