طالن أيام الغيبة -الشاعرادريس الشهيبى

من طرف **عبدالحفيظ عوض ربيع** 2009-06-09, 8:57 pm

طالن أيام الغيبة

يا ناسية طالن أيام الغيبة
عليك هنت والا من ظروف صعيبة ؟

طالن ايام الفرقة
ونارك مع وسط الستاير ترقى
وياما حملنا من ليالي زرقة
والعين شاقية بغلاك وتهاتيبه
وكي غلاك ما غليوا عرب فى برقة
سوا من علَم والا عريب عطيبة
نحن موش لقـّاقة ظلام وسرقة
نحن صوبنا كل العرب تحكيبه
شيّالة الطايح فى نهار الشرقة
نهار كلّ حد هارب لغير الصيبة
أصحاب عهد وافي موش كذب ودرقة
أنواع الكلام انفصّلوا ترتيبه
قطعتي غلاء دوبه تمكّن عرقه
حلّفتك ايمين وبالنبي تشقيبه
وانعدّوه كي مسحة شراب العرقة
أنت تتركيه ونا عليّ نسيبه
ونوطا علي عقلي ونار الحرقة
صبّار خاطري نقدر عليه انجيبه
والمولى خلقها كل حدّ له طرقه
امفصّل الدنيا فى أطوار غريبة

****

طالن أيام غيابك
يا الخايل يا اللي لذيذ وجَابك
ويا اللي ايلجّن بالسواك أنيابك
وجَابك دواء كيف العسل فى طيبة
ويا اللي جبينك برق نوّه حابك
ذكّارة شتاء مزنه هذَل تسكيبه
ويا اللي تخيلي فى أصناف ثيابك
مع كل موضة ف البلاد عجيبة
ويا اللي اسماح امدوّرات كعابك
رشاقة وعدلَة ساق وتهنديبه
ويا اللي هدوبك نبتهن متشابك
اطوال فوق م الحاجب لهن تعكيبه
ويا اللي سهاريّك وروق شبابك
ايحيدن دراه الكبد والتضبيبة
ويا طول ما تقنى عليك أحبابك
واتجي ملاقيَه كيف الودود حبيبة
واتنطِّي ثمان أدروج فى مهلابك
سطّار جري لا فيها حرج لا غيبة
ويا طول ما تمّالنا مشرابك
سبيل غير ما ردنا معاك عطيبة
انقحّز وندنىَ للبعيد نهابك
حياء من عواقب شيّ ما تدريبه
وبلا وعي صارحتي جميع أحبابك
وقلتي اللي مفروض ما تدويبه
وتحسابي الدنيا من أعطاب خيابك
اتسير فى نظاف وهي ظلام وريبة
وأنت تربحي وأنا شطبت حسابك
غباوين يا مول العيون رغيبة

****

طالن ايام جضارك
لهن زمان ما طافن علي أخبارك
يا اللي غلاك مع الزمان مشارك
سرّاقة تسير لخاطري تمشيبه
غلطتي وقلتي للبنات أسرارك
وهن بدورهن جرّن عليك مصيبة
وعادة العرب فوق القعود البارك
ايزيدوا مع ثقل الحمول صليبه
واللي تقربه رايف عليه اجوارك
قدّامك حبيب ومن وراك دبيبة
وفتـّالة حبال السوّ من خطـّارك
ما يصدّقوا يلقوا عليك غبيبة
موش غير فى حبك ونوع اجرارك
برنامج العرب نكره أنجيب سريبه
بالله ننصحك ديما ايـّاك حذارك
اللي مو علَم تنسيب ما تشقيبه
ايجن أوقات تنخدعي اتبان عوَارك
واذيول العرب يغرّوك بالتلعيبة
يا اللي توارى في النظاف أسوارك
لا قداك في خدعة ولا توكيبة
حلال قسمتك للي امشيّط نارك
أنت له مراد وهو اللي تزهيبة

من طرف حمدى عريف 2009-06-09, 9:41 pm

طالن أيام الغيبة الشاعر ادريس الشهيبى مشكور وتقبل مرورى على صفحتك

من طرف **عبدالحفيظ عوض ربيع** 2009-06-09, 10:02 pm

هذه صفحتك ونحن ضيوف عندك ومشكورعلى المرور

من طرف المثقف 2009-06-09, 10:21 pm

مشكور أخي حفيظ وتقبل مروري

من طرف قلب العروبه 2009-06-09, 11:30 pm

شكرا لك
ودمت بكل ود لنا
تحياتى

من طرف د/السنوسى سعيد مجيد 2009-06-09, 11:38 pm

والله يا اخي عبدالحفيظ قصيده رائعه جدا ,ولكن نريد المزيد عن قصائد هذا الشاعر ,انا عن نفسي قراتها اكثر من مره فكلامها مترابط ودقيق في الوصف ومثير للمشاعر

من طرف **عبدالحفيظ عوض ربيع** 2009-06-12, 11:02 am

مع انى ليس من هواة الشعرالشعبى ولكن تعجبنى بعض القصائد ومشكورين على المتابعه

من طرف **بوفرقه** 2009-06-12, 7:19 pm

عبدالحفيظ عوض ربيع كتب:مع انى ليس من هواة الشعرالشعبى ولكن تعجبنى بعض القصائد ومشكورين على المتابعه

منقلب شاعر ابعدى يابو محمد ...مزيد من الشعر الشعبى مشكور على هذه القصيده ورحم الله الشاعر ادريس الشهيبى

من طرف **عبدالحفيظ عوض ربيع** 2009-06-19, 6:36 pm

مشكورعلى المروريابوفرقه

من طرف **STAR** 2010-06-20, 10:24 am

مشكور على هذة المشاركة الجد قيمة وانت دائماً مميز بكل ما تأتى بة من جديد ورائع موفق وفى انتظار القادم منك واكيد القادم اجمل

طالن أيام الغيبة -الشاعرادريس الشهيبى

طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى

رد: طالن أيام الغيبة -الشاعرادريس الشهيبى