يدَّاولن ليَّام بين الناس ما يْهمِّهن في الذيل لا في الراس

أوقــــات يعطن وأوقــات يبقن يرفسن ويهطن

ما عمرهن درب السقام القطن إن كان برَّمن لازم الهن نعكاس
كمِّين راكب عَ الوطاه ابلطن علي شوكن دقل بْغير امداس
واللِّي رَخَن حبله عليه اقشطن وْذاق مِرَّهن مِ القنط نين نهاس
ويزيدن بسال الريق كان اسمطن ويخلِّنا فواه ايريِّلن يبَّاس
ليَام ما تامــنهن خلَّك فطين وْخوذ حذرك منـــهن
راك يا عديم الراي تستحسنهن هوَّايهن مو دايمًا ملاَّس
بوعقل مِ التقليب ما يضمنــهن حتى إن شرهبن ماهن وْجوه كواس
إن زانن يثنِّي في العقاب عفنهن غريب طبعهن بالعقل ما ينقاس
يدَّاولن ليَّـام بين الخَلَق وريت بصرهن ضَيَّق علي الخَلِق
وما من حجايج يوصلن في الحَلَق إن كان قلتن نبقى جنيت حساس
وميط مِ الكلام يْضرَّ كيف الطَّلَق البوح بيه مو ساهل يريد افراس
وأبواب العداوة قفلهن والغلق شيمة انظاف قلوب موش أنجاس
مْعَ كلّ دَمّ يْبادروا بالعلق ويبنوا بناء ما يوم هدُّوا ساس
يدَّاولن ليّام دالة دالة يْواطن ارجال وْيرفعن رجَّالة
ويخلِّن خصيص العرف بوهذمالة شيخ ينطرى للخايلة لبَّـاس
علي شان كرسيَّه وْكثرَةْ مـاله ايديروه عاقلهم وْهو رَفَّاس
وبو عقل للحكمة إن دار ادلالة تزطل ايخلُّوها احذاه أكداس
بلا مال والاَّ جاه من يصغاله ما لها امراعي حَجَّته تنداس
هاذي حقيقة مِ العكس وأشكاله وْقول مو اتبلِّي له عمد وأساس
يدَّاولن ليَّام يا نشَّادة عليهن اخذوا مني علل مفاده
يرضِّن اللِّي ما ترتضى في العادة كيف العطيب اللِّي عديم إحساس
ويديرن الزينة فوق مِ المعتاده ويهندلن لك من الحرير ألباس
وبين الحباب يفرقن بإعادة ويغيب الجنين والخّ والونَّاس
ويجيبن اللِّي كانت عليك مكادة وتقول ريتن ماهن وْجوه نحاس
وهن غرّ ذمُّوهن اللِّي مجَّادة لحقوا طينهن كي زوَّدوا لغماس
أوقات ايجودن ويجنَّك ابروقه في الصباح يقودن
ويجيك همَّهن عقب النهار يدودن وما تروق قعدة لا يطيب انعاس
بعد بياض نوَّر يومهن ينسودن وما يعطن للمكروب روق أنفاس
ولا يصنعن طايح ولا مسنودن ولاحقات عَ الفارس وْعَ الترَّاس
يدَّاولن ليَّام من مولاهن هذا حالهن من يوم فـــيه نشاهن
واحد يورَّنَّه حْـدود زهاهن يعيش في طرفهن عيـشة الريَّاس
ولاخر امرار وحـنظلة يلقاهن بين عازته يصهـد وبين فلاس
واحد اربح في بيعهن واشراهن اللِّي ما هتك حرمة ولو مـرطاس
ولاخر اخسر بالدين حطّ اكراهن زرع غير موحاسب وراه ادراس
واحد بهتن ما اعبي بعباهن يعدّ في رحيله يوم حــــفر الفاس
ولاخر أقدامه بايدات وراهن غير ما جنى منهن إلاَّ التـــعاس
ليَّام يا شاقي اشقاق شقاهن وهن ينطون بك طويةْ القرطاس
بْصفحات مكتوبات لو تقراهن اتريدهن زها تلقى أكثرهن باس
في أفراحهن بنُّوا خْيام عزاهن أحزان ومناحه قالبـات أعراس
زايلات يا اللِّي قلت غندقناهن ما يْدوم فيهن ظلّ لا مشماس
وِدَّك العاقل بالهدى يسعاعهن وْوقته لطاعة خالقه كرَّاس
ما تنظره منشط من يالاهن نين في حيـاته راكبه وسواس
ويا عون من حاسب حساب فناهن امخمَّم وْضارب في الخماس سداس
القيهن غرر ما غرّ بيه عفاهن وْعارفه يروِّح سيَّلهن كنَّـــاس
علي جالته سفوةْ عذا يسفاهن وما يْبات فيهن شي للرمَّاس
هاذين هن ليَّام جرَّبناهن وانشد اللِّي ناظر صحيح وْقاس
حديثِن عجب سبحان من سَوَّاهن وْدار كلّ شيّ بالكيل والمقياس
تنظر علي مَر الزمان اخياهن وْفيهن يْبيِّن كل يوم فساس
حتى إن قربن هابا علي مطراهن وراهن افراق لشملهن بحواس
~~~~~~~~~~~~~~~~~~~~~~~~~~~~~~~~~~~~~

سلمـــــــــــــــــــــــــك

مشكــــــــــــــــــــــــور وبارك الله فيك يابو ادريس

مشكــــــــــــــــــــــــورين وبارك الله فيكم ع المتابعه والاطلاع

مشكــــــــــــــــــــــــوره وبارك الله فيك ع المتابعه والاطلاع