بصراحه

قلت بصراحه ما تريد خداعي
من طرف واحد حب ما لا داعي
في البدايه خفت
من عنف القرار وين لي اعترافت
ما صدقت سمعي في ذهول وقفت
وانت تجادلني تريد اقناعي
رديت في كلامك ليش بعد حلفت
سبقت كراعك في الطريق كراعي
ليش ميعاد الغلا والفت
تقسم معاي الليل وانت واعي
لسان المحبه ليش بيه هتفت
تردد اهازيج الغلا في اسماعي
خيرة نواوير الغرام قطفت
ادفيت بشموسي عشقت شعاعي
كيف بعد الغلا اكتشفت
موت المشاعر وانت لي ساعي
ان كنت حاس انك معاي انصفت
ليش دمعتك سالت نهار وداعي
ليش وين ضمنك ايدي رجفت
تعلقت ليش بدفتي وشراعي

نسيت احساساتي
نسيت دمع الشوق ومعاناتي
حجر الاساس وضعت في مأساتي
استغربت ليش بكاي واندفاعي
نبكي علي اجمل سنين حياتي
مشيي علي اول طريق اوجاعي
بعد الغلا كيف ننزعك من ذاتي
وانت غرامك رفقتي واتباعي
قرارك نسف اخر دروب نجاتي
شيل اثم دمعي وحيرتي وضياعي

للشاعره :بدريه الاشهب