يوميات :الحاج بلقاسم.. والتسلق والتطبيل للنظام

من طرف **زهرة اللوتس** 2012-01-11, 7:32 pm

الحاج بلقاسم :- والله شي إيدوخ الجميع متهم بالتسلق والتطبيل للنظام رغم ان الذين ظهرو على الشاشة ايام الاحداث ماهمش اعلاميين ولكن لبسناها ياصاحبى وانت متهم بانك كنت بالجيش اللاكتروني
قاسم :- عارف اني واثق لما خوك هارب من حفرة لي حفرة فيه هلبا ناس كانت هداك الوقت تزمزك، ولما خوك شادينه زي الكلب يلحس في دمه من التراب، فيه من يلحس في كنادر الجماعة، ولما خوك بلا فلوس هايم ع وجهه في تونس، فيه من يقبض في الاخضر ، يا حاج واللي قالك جيش الكتروني قوله هات الدليل
الحاج بلقاسم : - الجيش اللاكترونى وهذا المصطلح في حقيقة الامر ليس بصحيح لاهناك جيش اكترونى ولا طياح سعد
كم تتوقع عدد الليبين الموجودين بمصر واللى خايفين او يبو يرجعوا
قاسم :- اكبد ياسرين ومعبين لبلاد ومبحبحين في الكوشري ومن ترعة لترعه لين ياتى الله بالرجعه وحتى انا واجعينى وخصوصا اللى مش امداير شى غير جاي في الدهامة
الحاج بلقاسم :- وهذي مشكلة كبيرة هناك 40 الف ليبي موجودين بالجزائر عايشين في اجواء سيئه في الفنادق واهاليهم يقومون بالصرف عليهم وقيس على ذلك في تونس ودول العالم وهذا الموضوع له ابعاد اجتماعية ونفسية وسياسية ونحن لاهيين بمواضيع الموائد والاعتصامات
قاسم :- القذافي وجماعته سمو اللي هربو منشقين وخونه، والثوار اليوم سمو اللي هبرو طحالب وازلام القذافي، هو صح التاريخ يعيد نفسه، في الحالتين فيه ناس هاربة، وهني ايجي دور المصالحة الوطنيه
الحاج بلقاسم :- فعلا يجب ان يرفع صقف المصالحة الوطنية وبسرعة لان الوقت لاينتظر والمشاكل تتفاقم لااخواننا ومفيش اذاعة من الاذاعات التى تطل علينا من عواصم العالم بنواياها المختلفة فامت بفتح هذة المواضيع
وكيف ماحدث للثوار في بداية الثورة الخوف من المجهول مع تغيير فى الفارق فالثوار لقوا الدعم من اغلب الليبين وتم استجار البيوت على حساب اصحاب الخير والداعمين للثورة وهولا اخوتنا واهالينا ينتظرون المساعدة والصفح
قاسم :- وللاسف يا حاج مرات تسمع فيها كلام تحت مسمى المصالحة الوطنية ولكن في الباطن ايباري مخززات
الحاج بلقاسم :- الان للى قلبه على البلاد هو اللى يسعى للم الجراح الاجتماعية في اكبر عملية تهجير تشهدها ليبيا
قاسم :- واللي قلبه علي منصب الله يعطيه منصبه على دماغة يدير قناة ويبدى يتحدث على الشعب الليبي وكانه المنقذ وهو اللى خلص الليبين من حكم القبور
الحاج بلقاسم :- والقناة مش محبة في عيون 17فبرائر ولكن التجهيز للدعاية الانتخابية من اجل الكراسى الله يعطيهم كسرة
قاسم :- لا ويا حاج مش هكى وبس تسمع من الشعارات لييييين تقول بلادنا جنة ، ولما تجي للواقع تلقى ربع الليبيين مشرتعين وشني ايلمهم من هالدول
الحاج بلقاسم :- يفترض هذا الموضوع من اولويات حكومة الكيب التى بدات تتساقط زى الرطب كل يوم يقدم واحد استقالته
قاسم :- والاستقلات ايقولوا عليها مؤشر على ان الوضع مش تمام، والحيط يا حاج اللي تنحي منه كل يوم رشاااااادة يتهدم يا حاج واحني مش ناقصين هدم
الحاج بلقاسم :- يكفينا هدم ياخوي امته نبدو نبنوا هلى البلاد للى كل يوم اعتصامات واخبار متضاربة وهذا ابسب في هذا وهذا يتكلم على هذا والمدارس على الابواب وصغارنا كيف بيشوفوا العام الدراسى الجديد وان شاء الله ما يغلطوش في الطابور الصباحى ويقولو نحن جيل غضب
وشــن درنـــالــهم يــاحـــبـيـبـتـي