يوميات :الحاج بلقاسم.. و 42 عام من عمر ليبيا كانت غيبوبة

من طرف **زهرة اللوتس** 2012-01-11, 7:36 pm

الحاج بلقاسم: قالك حنش صارله إنهيار عصبى ...قالوله ..خيرك؟ قاللهم حب 42 عام وفي الأخير طلع طوبو ضارباته الشمس، وحتى الشعيرات طلعوا زراعة!!!!
قاسم: يا حاج كيف طوبو وضارباته الشمس وشعيراته زراعة، وضح يا حاج، وإلا تساير في موضه الكلام الجديد متع هاليومين !!!
الحاج بلقاسم: يا خوي هذا تشبيه لوضع هلبا ناس ما تبيش تعيش الواقع، ما تبيش تشوف الحقيقة، وما تبيش تصدق أن 42 عام من عمر ليبيا كانت غيبوبة، سبات شتوي زي سبات الحنش!!! وطوبو طوووويل ومظلّم، ونهايته ما كانتش معروفة وين!
قاسم: إييييه فهمتك يا حاج، كلامك صح، لمكنتي الطوبو قصوه ع تنين وراح فيها، بس اللي جاي ياحاج مرات مليان طوبوات، كيف بمنيزوهم؟ على خاطر هما هلبا حسب ما نشوف، لأن واحد منهم قال للمعتصمين روحوا أرقدو!!! ( أني دافع ثمن بقائي هنا ) وراهو هادي قبل يومين بس، مش في فبراير اللي فات!!
الحاج بلقاسم: هذا اللي خايفين منه، وخايفين يطلع هذا تبيه قطر! وهداك جايباته أمريكا! وهذا علمانى وهذا متطرف! والشهداء اللى ماتوا ليهم الله... ماتقوليش أنت متشاءم!!!!
قاسم: آنيييييي!!! لا لا يا حاج، ماتقولش هالكلام أني أكثر واحد متفائل باللي جاي، بس غير لو كان نفتكو من هالمسميات والأوصاف واللي ايقولو مدعومه وجايبينها من برا، أو على الأقل إيفهموهانا، قبل ما تفوت أربعين عام تانية وحني إناحولو نفهموا !!!!
الحاج بلقاسم: عارف!!! الباين أنهم يراقبوا في الوضع وهم اللى يصنعوا في هالمشاكل باش إينسوا الليبيين،،، ونبدوا نرضو بالقليل، وطوابير البنزينة ولت من جديد، والناس وين تشوف طابور البنزية تنصاب بانهيار عصبي، والحنش عنه الحق... شوره نظره ضعيف زي بعض الليبين... يشوفوا في الديمقراطية اعتصام وتكسير وسبان وشتم، وحط ع الديمقراطية ما تتحمل الليخيده!!!!
قاسم: هيا تتحمل وبس يا حاج، تي مش هيا اللي قاعدين نمخضوا فيها تقول شكوة حليبها مش رايب، ونبو الزبدة في اسرع وقت، نبو نفهموها بعد ما كانت الديمو كراسي أربعين عام، الشعب على كراسي، وأي كراسي، كراسي الإعدام والتحقيق، وفي أحسن حال كرسي طبيب السنون وافضلهم كرسي الحلاق، واللي المفروض يكتبو عليها كلها خطر ممنوع الاقتراب، ع الاقل الناس ما تنصابش بفايروس قاتل، ما هو كل من هب ودب دار عيادة أوحلاق بلا رقابة، ديمقراطية يا حاج!!!!
الحاج بلقاسم: لكن شن علاقة الديمقراطية بطوابير البنزية وزحمة المصارق وهروب التغطية والياتريك، المواطن الليبي يبي يرتاح ويبي خدمات زي العالم والناس، يكفيه عذاب اربعين عام، وبعدين يحكونا على الديمقراطية والاعتصام وتكسير المكسّر وتخريب المخرّب، نبو حرية حقيقية مش فوضى، ولكن لازم يعرف أي واحد جاى من برة يوتى في روحه للكرسى، أن الكرسي مادامش لحد، وكان هذا عمك الحاج راهو ليه 42 عام امقعمز في كرسي حلاق الظهرة أخر عام حلقنا فيه كان تتفكر!!!
قاسم: فكرك الله في الشهادة، زعمك قاعد فاتح هاااااداك الحلاق، الشفوشوفة تبي حلاقة، 42 عام وكرسيه مشغول يا حاج ما حصلتش مكان!!!
الحاج بلقاسم: الكرسي يا خوي من نحاية الفضوه فاضي، بس قدام الباب أمة لا إله إلا الله تتعافر !!! خليك بوشفشوفه خير ما تموت زي مامات بوشفشوفة!!!!!
وشن درنالهم يا حبيبتي