قصيدة: إزالة لغرض التطوير/ للشاعر :مصطفى صوفيه

من طرف fofososo 2012-02-13, 10:35 pm

إزالة لغرض التطوير......... قرار كبير .......... وفبراير جانا بالخير

· إزالة غايتها تنطيره ........ مجرم ويدمّر في بلادي

ما يهنأ في فراش سريره ........ قسم تنادوا بيه اندادي
اليوم بعد ما صاح ضميره ......... رأس المجرم هو مرادي
اللي باين كذبه وتدبيره .......... مزيّف ما عنده مبادئ
نهار أحرف ما شفنا خيره .......... يوم لفي باته لبلادي
تزازي بيه عجوز حقيرة ............. ما بين هراوة وبوهادي
يلعن بوها هالشريرة .......... دارت دير .......... بلتنا بسفّاح خطير
إزالة لغرض التطوير......... قرار كبير.......... وفبراير جانا بالخير
شباب ليبيا قرّر الإزالة ...... لظلم القردافي وأعوانه
وطلبوا تطبيق العدالة ....... ضدّ خميس وكل أخوانه
قتل هلنا بكل نذالة ...... صواريخه وصلن جيرانه
المطلب نصر الله العالي ......... ضدّ الطاغي اللي عادانا
مانفعه الكيلاني وهالة ....... ولاشاكير...... وحمزة التهامي الحقير
إزالة لغرض التطوير......... قرار كبير.......... وفبراير جانا بالخير

· إزالة يالبيت الصامد ......... اليوم أركانك مهدومات

وينك يا بيت القايد ......... تهاوت كل التحصينات
اللي لبابك ما يقرب حد ........ برجليه ولا بسيارات
اللي فيه قواعد وعمد ......... بضرب الناتو مخلوعات

الكيلاني فيه يلمّد ........... موفّر كل الممنوعات

دار فيه منصّة وسدد ........... تغنّي فيه الزمزامات

وكل ساعة الطيّار يهد ......... يدمر تدمير ......... بيش يهدم وكر الشرير
إزالة لغرض التطوير......... قرار كبير.......... وفبراير جانا بالخير

· زليتن شافت ظلم كبير ......... هلكها بحقول الألغام

عددهن 80 ألف دمير ........ قتل العويلة والأنعام

وإسمه بالإرهاب شهير ......... زعيم عصابات الإجرام

زليتن قالت له مايصير ........ و ما نخشى غير العلاّم

ذخائر فيها الطاغي يحير ...... تغلغل في صدور الظــــلاّم

لا يرجع لا يورد بئر ....... ولا يهنأ لا تجيه أحلام
تقهقر للخلف تقهقير ........ رجوع إبادة وانتقام
الحاصل يا شيك تمرمير ......طحنا في زير ......لا عنده ذمّــه لا ضمير
إزالة لغرض التطوير......... قرار كبير.......... وفبراير جانا بالخير

· إزالة لغرض التطوير ......... إزالة لتطوير العمران

مصراته ما شافت خير ........ من أعوان الطاغي الجبان
مدافع وجراد وتدمير ....... هدم بيهن كل البنيان
عربها صنعوا مجد كبير ........ شهادة ما هم من الجرذان
تريس لهم تاريخ شهير ....... مسطّر من عهد الطليان
وللقردافي دارت دير ........ ملاحم ماهن للنسيان
خلاّته صرصور حقير ......... وأولاده شبه الفئران
صغيّر شأنه موش كبير ....... منتّف متدهكل مهان
وحمزة مع هالة وشاكير ....... وقاهر بوه مع وديان
وشيخ النطع ابليس كبير ....... بنوا له قصور بلا عمدان
تخلّى عنّه كل سفير ....... وكل ابن آدم عنده شأن
وتوا حاير كيف يدير ............لا معاه وزير ..........ولا صاحب ينصح بالخير
إزالة لغرض التطوير............... قرار كبير................ وفبراير جانا بالخير

· عبد القادر بطل كبير ......... غدر بيه رصاص الأشرار (1)

رصاص خيانه صب عليه ........ في ظهره من خاين غدّار
جوه رفاقه يحادوا فيه ........ في سيارة بسرعة طيّـــــار

رفيقه قـرّب كتفه ليه ........ همس له في أذنه بإختصار

الله اكبر يا خوي عليه ........ وهو في لحظة الإحتـظـار
ذرف دمعاته من عينيه ......... تبسّــم في وجوه الحـضّــار
وقال لهم ما نخاف عليه ........ وطنّــا في وجود الثوّار
وقال لهم شيلوني ليه ......... الحوش وحطّوني في الدار
توحشت الناس اللي فيه ........ هلي وخوتي كبار مع صغار
نبي نلفظ أنفاسي فيه ...... أستشهد في نصف المشوار
في البازة بيديا مواريه ......... جثمانه البطل المغوار
شهيد أوصافه تبان عليه ....... المبسم سبحان الصوّار
ونطلب في المولى يعلّــــيه ....... في جنة عدن مع الأبرار
عبد القادر بطل كبير ......... في وطن أسير......... من زليتن قاد التحرير
إزالة لغرض التطوير......... قرار كبير.......... وفبراير جانا بالخير
-------------------

(1) الشهيد/عبد القادر رمضان عقيل دلف - قائد ثوار زليتن في جبهة مصراته

الشاعر :مصطفى صوفيه – زليتن – ليبيا