في اول ذكرانا فبراير .

من طرف **زهرة اللوتس** 2012-02-17, 5:37 pm

في اول ذكرانا فبراير .. ظالم جاير .. سال دمانا دار غداير .. سيفه هدد دمه فاير .. جنّا جيشه .. نتفناهم ريشة ريشة
بعدها من باب عزيزية .. صاحب سية .. خبط عيّط كى الولية .. خطب ساعة ما شرب امية .. بابا عيشة .. طيرناه ولم قشيشه
بدا فى اولها تمه هازى .. جاها غازى .. استشهد بى يلتسن والنازى .. فى باله يمسح بنغازى .. يهنا عيشه .. لبّاس قفاطين الخيشة
طلعت من يده الزنتان .. عليه لامان .. الشيخ اللى هدد سلطان .. وما تاخذها يا شيطان .. ادوس حشيشه ..زنتانى وكّال تشيشة
صبتله وقفت مصراتة .. موت سقاته .. ماهى دموع ،الهم بكاته .. شرّبها دم وروّاته .. زاد غشيشه .. ما نفعه سيف ولا طيشه
اللى نبشو قبور الزينين .. الزاويين .. عليهم ما غمضتلى عين .. وفى كل صلاتى آمين .. يخيّب جيشه .. هدامين بيوت نقيشة
ومانى ناسى اصحاب الدار.. اللى محرار .. اللى ذبحوهم كى فجّار .. اللى كانو للحق انصار .. ايجوش كميشة .. قالو طز ف بات عويشة