محمد بن سليم : فِك المارشا (2)

من طرف **dude333** 2012-04-14, 8:07 pm

محمد بن سليم : فِك المارشا (2)
فِك المارشا مجموعة من الخواطر تحكي عن الهموم الحالية للمواطن الليبي بطريقة ( هم يضحّك وهم يبكّي) ، و معلش يسامحونا جماعة اللغة العربية لأن (فِك المارشا) ح تكون بالعامية لأنها زي الهدرزه بين اي اثنين ليبيين …
خلونا نفكّو المارشا ونهدّو السرعة ونحكو شويا .. لأنها الحق كثرت علينا .. كفرة .. سبها .. أزلام مازالوا في مناصبهم .. طرابلس ما تقدرش تنتخب مجلسها المحلي .. بنغازي تسابق في الوقت بيش تنتخب .. مؤتمر وطني عام بعد 8 أسابيع ومازال مازال .. باهي وين دور الرياضة من (الطبيخة) هذي؟؟ راهي الرياضة لها دور السحر في حل ـ أو حتى تساعد ـ في حل المواضيع السياسية ..
شوف كوريا الشمالية وكوريا الجنوبية كيف المباريات بينهم تخفف ضغط السياسة بعد ما يلبزوها جماعة العيون الضيقات .. وزي ما لها دور في الحل .. الرياضة لها دور في المشاكل وعندك مصر والجزائر مثلاً .. وربي مايجيب المشاكل عندنا بزيادة.. المهم ماتقولش أن الرياضة مالهاش دور .. باهي وشن يمنع مثلا نديرو دورة بين كم نادي لكرة القدم بحكم نحنا في ليبيا معظمنا يتابع في الكورة وكلنا وجعنا شهيد الكره (صالح النص) .. يعني دورة بين أربع أندية من كافة مناطق ليبيا .. ومش لازم التقيد باللاعبين الرسميين .. يعني لاعبين من النصر يقدرو يلعبو مع التحدي .. أو لاعبين من الاتحاد يلعبو مع أهلي بنغازي وتكون اسم الدورة باسم الشهيد (صالح النص) وتوا نشوفو تفاعل الناس معاها لأن والله ملينا من السياسة والتخوين والأزلام .. مانقدروش؟ عليش؟ خطر على الجمهور واللاعبين؟ دوبينك ماتقدرش تأمّن دورة ودية بين أندية ليبية .. كيف بالله عليك تقدر تأمّن ناس ماشيه تنتخب للمؤتمر الوطني العام بعد كم أسبوع؟
فكّ المارشا ياراجل وارخي روحك تعوم وخللي الناس اللي في النوادي تكلم بعضها وتحجز ملعب وتجيب أربع أندية وتدير حتى ياسيدي مبارة واحدة من تلات أشواط كل شوط يتلاقى فيه ناديين واللي يفوز منهم يتلاقو في شوط تالت .. وبعدها يرفعو شعار ليبيا وحده ويترحمو على الشهداء ويكرّمو أسرة الشهيد (صالح النص) وتخلي الناس مبسوطة وتروح لحواشينها تحكي على حاجه خاطي السياسة وتزرع فيهم مبادئ وأفكار وطنية بلكي حتى الندوات والمحاضرات ماتقدرش تأثر في الناس زي مباريات الكورة .. امغير فك المارشا وتوكل على الله
محمد بن سليم
14 ابريل 2012