أكـبـــــــار الســـــــــن

من طرف **العاشق الصغير** 2012-07-08, 12:45 am

أكـبـــــــار الســـــــــن

للشاعر - بودرباله أكنيش ..رحمه الله -

- وصاية ْ نصحْ للِّي حاضرين * مْعانا هنا وللناس الأبْعاد

علينا فرض من واجب الدين * أكبار السن ننهوْ ع الفساد

أكبار السن راكم راقدين *قولوا حس ياسر ما الرّقاد

وكل كبير ما للِّي قاعدين *عنده أولاد وألاَّ لهْ أحفاد

يْرد العيب ينهَى الخاطيين *راهْ النهوْ للخاطي أجْهاد

اوراه البني والساس المتين * يبنوا فيه بأكبار الرشاد

اورانا هدف ما لمستهدفين * من الكفار والناس الأوغاد

ضنانا عيب يبدو ساكرين *ويباتوا فا لزناقي فا البلاد

مقتولين وألاَّ قاتلين *فات العمر منهم في نكاد

وألاَّ قال قايل سارقين *العين بْعين ع الغربال زاد

أكبار السن راكم راخيين *رخيتوْا الصرعْ نين جاء للجواد

أكبار السن قبل أمعاصرين *اسْنين الشر وأيام الكساد

امنـِّينا فالمعيايش شارقين *وحيل الناس قاصر عن الزاد

قل المال ما قلّ أش الدين *ولا لامان ما لقلوب حاد

واليوم أشباع هانا بادنين *وقيس البدن شارك فا لشراد

حسبْ ما فيه ولانا خايفين*ابْقينا أحنا وضنوتنا أنداد

اتريد ضناك يمشو عا ليمين * خذو ليسار عن رايك ابعاد

ابقيتوْا فالدباير حايرين* كيف الراي وين الراي عاد

أكبار السن راكم ذاهبين * خذاكم درب واعر فا لرّداد

ولا أنتم مْعاه تبدو ما شيين * منا فز ماهْ جنْ عنكم أبعاد

أكبار السن كان فيكم فطين *ياخذ درس منـَّه يستفاد

نفسك هيِّ ومالك والبنين * راهن أعداك كان تاخذ أرشاد

وإن كان ضناك ميش امْربيين * شلتْ ذنوب ما عنـَّك أجحاد

وابْديت اتحوس بين اللاعنين * يلعن فيك ربَّك والعباد

ربُّوا اليَا أبْديتوا ضانيين * با لترباي تحضوْا بالأمجاد

راكم في مهالك رايحين * شدُّو السوط ما ينفع أسعاد

وما تقعدش بين الجربتين * صحيحه لوْ اتقيدّها أقياد

أن سلْمت عام ما تسلم أثنين * مرض مكروْه يدعي ما لأبعاد

وفيه أكبار ماهم واجدين * هم أجواد والضنوَه أجواد

ايخدُّوا ع المعايش كادحين * ورزق الناس من سوَّه أبعاد

عفاف النفس ما هم ساقطين * لْهم تاريخ قاعد ع الحياد

وفيه أكبار راهم خايفين * إيْهابوا فالهرايج والعناد

ايْعانوْا في عجايز واحلين * هن وإبليس والخانب أرياد

إن كان انشدوا قالوا أفلان وين * يقولن كيف ناض مْن الرقاد

وهن ميجال ما رنـَّا ابْعين * وألاَّ فوق منـَّه بالأعداد

أكبار السن يمشوا ساكتين * خذوا ع الغلب قدروْا ع السّعاد

وفيه أكبار تمُّوا طاربين * بعد الرزق بالمسروق زاد

يجرو في أركانه فارحين * وهوْ مالدَّار للنار امتداد

حرامه ع الحلال امخلطين *نين البيض غبْين فالسواد

أحساب القبر ما هم دايرين * نهار الموت يوم سلّ الوساد

وفات العمر ما داروْا عوين * إيْلا قوا بيه خلاَّق العباد

أكبار السن كونوا مصلحين * وبين الناس رقـَّاعة ْ بياد

علي هيفوف راكم واقفين *ملكْ لرواح صبْعَه ع الزناد

مثيل الزرع مانكم غابيين * إن طاب الزرع يالاه الحصاد

وتوْ الكبير ما للِّي عارفين * إيْرد عليِّ كان عنده أرداد

شهادة والشهادة من الدين * يقول الحق ما يْعاند أعناد

أكبار السن فعلاً خاطيين * وألاَّ القول خاطي يا أجواد

وبعد القول ع الكامل الزين *اللِّي مبعوث رحمه للعباد

صلاه وسلام كاد الحاسبين * أعداد الرمل وأعداد الرشاد

م ن ق و ل