باب العزيــــــــزيــة

من طرف **زهرة اللوتس** 2012-07-10, 6:14 pm

:باب العزيــــــــزيــة
وين سيف ومعمر و وين صفية
ارّيد ننشدك..( يا باب لعزيزية ) !؟
- وين معمر
و وين الجيوش اللي عليهن قمّر
سيّبهن و تمّا ف الحفر يطّمّر
بعد كان قبل آمين للقومية
و الشعب منّه في عنا متسمّر
كلّـتّم امعاه التاع في جوجيّــه
- وين هي العزوز
اللي زاد م اللي ظاربين الكوز
ياما علينا سمسرت ف الموز
ابواخر ايكرّن م الكوادوريّـــة
و اليوم اصبحت فيها الزكاة اتجوز
بعد فيزقة و تبذير موش اشويّـة
- وين احميدا
اللي خونته للعهد موش جديدة
اخسارة ادموعه و عبرته و تنهيده
ف قناة الجزيرة اظهرت صورة حيّة
انسيهن ايام الطغو و اتعربيده
و اليوم ايتبكّـا و معترف بالسيّة
- وين هانيبـال
وين معتصم و الساعدي الهذمال
اللي ع المعاصي طرطشوا الاموال
ذريّـة حرام و راضعــة الذيليّـــة
و كمّين عاشوا من اسنين دلال
و ع العيب و الرزالة و دّروا الماليّة
- وين هنـــاء
وسيف العرب حاسبينهم شهداء
بعد موتهم ردّوا علي الحيــاة
و ابن آدم اوقات اتضحكا البليّة
صيّور كذبهم مفضوح غير شقــا
و تكثيرة البصل في وكلته عاديّة
- وين اكتابـه
و وين العباة و الجرد وين انقابه
و وين احمد ابراهيم و العصابــة
اللي املمّدة من كل شعب و فيّة
شلّة عطيبة و كلهم نصّابة
لهم باع ف الاجرام و الدونيّة

- وين سبعة ابريل
وين هن لجان الكفر و التضليل
فينا اللي داروه موش قليل
اقلال الحياة لا اصل لا بيتيّة
اعدام للشباب بدون اي دليل
واتيين دوم بتهمة الرجعيّة
- وين هو التكتوك
وين هو القايد مالك الملوك
وين الوفود اللي جلايب جوك
وخذوا وخيذة جيش في قطعيّة
حتى ف الخيال اليوم ما يطروك
و لا عاد شورك يحلموا بالجيّـــة
- بالله قولــّـي يـــا باب لعزيزيّـــة
وين سيف و معمّر و وين صفيّة ؟
باب العزيــــــــزيــة 255300_412892998756477_577861571_n