( سلامى لها شيل ياطيرطاير)

من طرف **العاشق الصغير** 2012-08-20, 11:24 pm

قصيدة ( سلامى لها شيل ياطيرطاير)

للشاعر احميدة مطرود الجالى

سلامي لها شيل يا طير طاير ريم العقاير وقول الجفا طال والشوق جاير

سلامي لها شيل يا طير عدي...حذاها وهدي...جناحك لها مد كي نمد يدي

واحكي لها علي شوق حالي مردي...واللي في صاير... بعدهم وما ريت فيت القهاير

سلامي لها شيل يا طير جايل...وجيب لي مسايل...فايّن اوطان هم وايّن عمايل

شوقي لهم جار والبعد طايل...وما لي قداير...بشيل حمل لفراق لكن نساير

وعزمي خلاص رق تمن ولايل...يجن سيل عاير...دموعي بعد يخطرن ها الجراير

سلامي لها شيل يا طير راني ... فراقهم رزاني ... شارف علي الموت منه نعاني

حال من طْعن غدر من يد جاني ... وهو الدم فاير ... وتمت خراب سوق بين العشاير

سلامي لها شيل يا طير طير ... ولاهن بخير... أحوالي لها قول منك ضرير

وراني تعوزت فيه الدمير... وبانن مواير ... خرابه بقي دوم حايس وحاير

وكاين الا عقل عامر كبير... وصاحب دباير... مصوقر نعد زلته م الكباير

سلامي لها شيل يا طير هيّا ... معروف فيّا ... ديره وها النار بَرّد شْوية

مول الخجل سود كاحل صْبَيّه ... بو خد ناير... منه مراجيك جيب لي بشاير

وشوف الدهر في غيابه عليّا ... فيه ويش داير ... ع العهد ما زال والاّ مغاير

سلامي لها شيل يا طير سارح ... وبالحال صارح ... اللي العقل طانيه والقلب جارح

وقول له لْقيت شين خلو المطارح ... بعد دور داير... هنا كان للعقل لا جاه زاير

سلامي لها شيل يا طير طول ... نْريدك رسول ... تْعَدّي وفي الرد تبقى عَجول

وان كانهم على الحال نشدوك قول ... مذهوب الشواير... يْخَمّم وما عاد نمّى ثماير

تحويشة غلا عمر فيها نعول ... جا ياس غاير ... قحشها ونا نلت فيت الخساير

سلامي لها شيل يا طير حايم ... يرق العزايم ... فراقها بلا وداع والقلب هايم

والدنيا هذي هي ما حال دايم ... تجيك بْبصاير ... لا لك بهن علم لا حساب داير

بالله ويش الاخبار وكيف حالكم يا حبايب

عليكم سلامي الحار سلام قلب م الشوق ذايب

وان كان تنشدو ويش صار بعدكم بقي الفكر غايب

وخليت علينا الدار وها العقل شايل وجايب

محوس معاه لَنْظار وديما دْموعهن سكايب

تعالو وطفو النار وم القلب حيدو غبايب

نْريده دناكم اجهار ولا نْحسّ في اللي يعايب

بعدكم لْقيت الديار اوهام موحشات وخرايب

مشى ربيعهن ولَخضار بعدكم وتمن جدايب

ان تاق مزن قالن امطار وهن كاذبات السحايب

وما تقول كانن عمار بهلهن سْماح الدّرايب

ولا نجع جوه خطّار وناض الولد كي الشايب

ولا بقربهم عز جار ايام الرخا والكرايب

ولا قَدّموا شيخ دَبّار وسيع بال والراي صايب

ولا فَزّعوت فتية اميار م اللي يخلصوا في الوكايب

علي خيل جيد وجسّار يْجَن يقلبن في الترايب

ولا تقول كان موكار ها الوطن لامّ الجنايب

ولا شولها والعشار حْشدت فيه كيف الكتايب

هميلة وسيع المدار ولا نزرت في زرايب

يا الوقت يا الدوار تجي برمتك بالعجايب

دْيار شوم ماهن مزار اوهام ينذرن بالمصايب

نحسابهن يحيدن جذار لهن جيت رديت خايب

وويش جبده ها الجرار ونا منقضه كنت هايب

لي عقل دوم خطار يْجَنّه جلايب جلايب

وعين والفت بالاسحار ولا جربت نوم طايب

لها دمع دوم قطار كما دمع قزون سايب

ولي قلب ذايب اقهار وماله بلاكم سبايب

واسلمتوا
م ن ق و ل