بعد مراضها

من طرف **العاشق الصغير** 2012-08-20, 11:54 pm

الشاعر خالد بورميله
بعد مراضها
.....................
بعد مراضها فـي عَفَـا ديـر .. بدري شموس والعام خايب
عفا بغـو طالـق بهاريـر .. نواره مسـوًى ضبايـب
شماريـخ روس البعاثيـر ..وهن تقـول فـلات رايـب
اللي تجيه تنساه وتحيـر .. ع اللي حـذاه لاخـر يعايـب
وتلقى الخلف فيه الخواوير .. علـى ذراه شايـل صلايـب
تقول فـوق منـه كواديـر.. غارقـات فـيـه الجنـايـب
وتلقي فيه هـش المواخيـر .. تيـار ثديهـا تقـول عايـب
جشا ، حنينها في التقاذيـر .. علـى حوارهـا بالرجـايـب
نواقيس ضـرب النقاقيـر .. اجراس فيشطه يـوم نايـب
يبقن الوانهافيـه تصويـر .. تفصيـل لونهـا بالخضايـب
البيض كيف قلـب الجماميـر..اللـي نشـو باثمـار طايـب
وفيهـن عتاتـى دواويـر .. سبيب سـود دايـر قضـاب
والحمر لك صبـاغ تمغيـر.. والاً دمـوم سفـك النشايـب
والزرق كيف فحم البوابيـر .. والاً صبـاغ نيـل العصايـب
والخضر كيف طبع الجنازير .. جنان فـوق بـردي سكايـب
والصفر كيف جماعة القيـر .. نحلة ميـر والجبـح طايـب
سبيب شعلهـا م التغنزيـر .. يـوري الـوان العجـايـب
حسـك مغربيـه مشاتيـر .. عليه جـاد غيـث السحايـب
بدريه وفـورار ومشيـر .. علي اثر مارسه جن عصايب
قماشات من شبهـة الزيـر .. حجل حجول بيـض اللهايـب
ومعاهن تفاصيـل كشميـر .. على لـون ريـش العبايـب
وفحلها ان زف البناديـر .. وتمـت جلايـب ، جـلايـب
تجيه كيف عرض الطوابير .. تشالـي مـشـالاة غـايـب
تحليق الفـرق والمجاسيـر.. عليه كيـف طـار الندايـب
وهو كيف ما تلبـس الميـر..اللـى مـن اميـار العرايـب
برنوس ملف زقـزا تبيطيـر..نواشييـن ريـس كتـايـب
تصريـدة أنيابـه صفافـيـر..تجيب قـرن منهـا ذهايـب
ومباتاتهـا فــي قـواويـر..هشيم طلـح روسـه كعايـب
وداوريـن فيهـن عقاقـيـر..غلاظ عشب نانـت عصايـب
واليوم عن براكة الطيـر ..جفايـا عـراض الجنـايـب
انتِ فيه مـا تنظـري خيـر..وحنا نزمطـوا فـي هزايـب
ولو كان موتنا جت بتحريـر..معاهم وفـي عـون طايـب
القنو فـوق سبـق مشاهيـر..جـانـبـات والاً جـنـايـب
مـره يطوحـن بالمناذيـر .. ومره يخلطـن فـي لدايـب
ولا حبسنـا وهـا التقهيـر.. وفقـدة مسامـى حبـايـب
م المغـاربـة والعواقـيـر.. سمـاح العـنـا والـدرايـب
كسـارة خشـوم المناقيـر .. ولطام كل مسـرف وعايـب
اجواد في الرفق مالهم نظير .. يحامـوك والبخـش ثـايـب
وركابه علـي كـل قنتيـر .. حصى لرض في يديه ذايـب
غزير النصـى بوجراجيـر .. عريض صدر وافي النجايـب
قناد للطواريـف والديـر.. وين ما جفـل جـن هذايـب
عليه سرز مكسـى بالحريـر..وركاب حمر طالـق شهايـب
علـى مرافقـه بولشابيـر .. منيـن خمـلـه بالنهـايـب
وعذار بالقصـب والتكاريـرقصابيـه فيهـن زعـايـب
وحلاس تونسي بـو نواويـر..وبدود كيـف رق الضرايـب
حلال البكا وجبـد الغويـر .. بعدهـم وشـيـل التـرايـب
وهل بيـوت ملفـا خطاطيـر..واليوم عاد راحـن زرايـب
وهل طفل عصران الضميـر..سليم مـن جميـع الشوايـب
مكاتيب مـو قـلً تدبيـر .. فراسيـن راحـوا ذهـايـب
مرار قطـف روس النواويـر..خلًى الوجه والـراس شايـب
اللي ما جلا وخـش السريـر..مشَى لوطـن ثانـي غرايـب
والقاعدين تحـت التغصويـر..وما لهم مـع الـروم نايـب
جزا وحبس ديما وتقريـر .. وكـل يـوم وحديـن جايـب
وحق بوقبب بيض م الجيـر..وكـل شيـخ عابـد وتايـب
عليهم ان جبـت التفاكيـر .. دموعـى يتـمـن سكـايـب
وتخطر علـيً مخاطيـر .. الليـل ناخـذه بالحسـايـب
واللي عـاد جـر المقاديـر .. ولكل شـيً جاعـل سبايـب
انعن غمامهـا طـلً ويطيـر..بعون مـن ريـاح الهبايـب
وصلاتي بعد هـا التفكيـر .. علي شفيـع يـوم العتايـب

م ن ق و ل

من طرف فرج احميد 2012-08-22, 9:11 pm

تسلم اخى العاشق

من طرف **العاشق الصغير** 2012-08-23, 2:41 am

مشكور خوي فرج وبارك الله فيك علي المرور الطيب

بعد مراضها

بعد مراضها

رد: بعد مراضها

رد: بعد مراضها