ياحلم

ياحلم كان كبير
باني عليك آمال ناوي خير
أيش غيّرك ؟!

ياحلم بيك أفرحنا
ورسمنا أحلام وفى الخيال سرحنا
وهمنا مع نسمة الحب ومحنا
وبنينا أقصور امفرّشة بحرير

وخذينا أورود وعالوطاه طرحنا
وكم نهر ماتسمع أمغير خرير

وبحصان أبيض عالسحاب ردحنا
أمعانا أصناف امشكّلة م الطير

وجهة نظَرنا للنجوم شرحنا
بأجمل معاني الحب فالتعبير

عليك حلم دافي شالنا وأرتحنا
ومابيه بحنا سرّنا فى بير

واللي شكىَ مالحب قلنا نحنا
مُحال نشكي همّنا للغير

وضحكنا على المجروح نين أجرحنا
وذقنا أمرار الجرح والتسطير

على من هزينا ياألله سامحنا
نلقان الفراق عذاب وأتقطمير

بكينا أدموع,ومالدّموع نزحنا
وقسنا أسمور الليل والتفكير