بدت عكسية راجل بقي خاتم في يد ولية الامووور يا صاحب بدت عكسي

بدت عكسية راجل بقي خاتم في يد ولية الامووور يا صاحب بدت عكسية

قبل ما ياخذها *** بنية خجولة هي اللي رايدها
كلم خواته وجهته حددها *** قدا منو جاباته لها قسمية
وبعد التخرج حددوا زفتها *** بعد ما خطوبتها بدت رسمية
علي بيتهم كم كندرة بييدها *** قليل وين مايشيلش امعاه هدية
وانعم وحاضر دوم بيرددها *** مدنقر وخايف يا عليك بلية
اللي تطلبه ايلبيه في لحظتها *** ياحيف ع التريس اللي بلا شخصية

بدت عكسية راجل
بقي خاتم في يد ولية الامووور يا صاحب بدت عكسية

بعد ما خذاته *** كيف ما الخاتم في ايدها لبساته
بتخطيط شيطاني عليك شماته *** عبت دماغه بالافكار السية
قدامه علي امه صوتها علاته *** حاقد علي امه الاجل قاعدة حية
وكاره وجود اميمته وخواته *** ولو كان لاقي ساحقهم جملية
وكل من هو حكمه بيد مراته *** ما ليشي قيمة ولا همية
نسي اميمته اللي فبطنها حملاته *** تسع شهور طوال موش شوية
نسي ايام كان صغير في قماطة *** في غمرها من الصبح لال العشية
نسي ايام كيف تبدلوا خطواته *** وهي تقوله ديدش وليدي هيا
نسي ايام كان لصدها ضماته *** حنان الامومة ماهناكش زيه
نسي ايام كان مرض ما ساباته *** لا الصبح سهرانه حذاه وحية
نسي كل ما دارت وما عاناته *** مشي في مهب الريح ريح قوية
ايخططلها وايعيد في حساباته *** وقال تو برقدلها المية
ايخططلها وايعيد في حساباته *** وقال تو برقدلها المية
وزاد قال بمفهوم عباراته *** انه هاالعزوز امنكدتها عليا
بنرميها في برويطة الساعة تلاته *** وجودها ما عاد ينفع بيا
ولا بضربة قاضية مواته *** نردمها وننفض من التراب ايديا
واندير روحي دمعتي فلاته *** ويبدوا العزاية ايعزو فيا
كنه العزوز بوذنها سمعاته *** عرفت انه ناويلها ع السية
وهي صابرة عل المر اللي ضاقاته *** وفي كل لحظة تزورها المنية
رفعت ايديها للكريم دعاته *** بقولت انتا عالم بكل خفية
رفعت ايديها للكريم دعاته *** بقولت انتا عالم بكل خفية
تهدي وليدي لطريق نجاته *** ونا انموت نبقى راضية مرضية
بكت لين حتى نظرها فقداته *** عزلها في غرفة بروحها منسية

بدت عكسية راجل بقي خاتم في يد ولية الامووور يا صاحب بدت عكسية

بعد معزلها *** بتخطيط من مرته وزاد تقنها
وقال باش نفتكو من مشاكلها *** مجرم عديم الاصل والبيتية
عدل امورة ساعته معدلها *** هاذي فرصته مادامها معمية
وناض في عقاب الليل بي يقتلها *** ميت احساسه والضمير سوية
بسكين في ايده الليمنا شايلها *** هو ومن وراه اللي خبيثة نية
متوفية من قبل لا يوصلها *** وهي مادة ايديها تريد امية
اجعنه ضرير في عيشته واكلها *** يكمل حياته ع الفراش رمية

بدت عكسية راجل بقي خاتم في يد ولية الامووور يا صاحب بدت عكسية

ما عليه ايخف *** لا المرض لا ذنبه اللي اقترف
يظل يسطفق لين التراب ايسف *** وتنزل دموعه سايلات سخية
وظهرة يتعوج كيف حرف f *** من قبل لا يوصل في نص المية
اجعنه احمولة من الهموم استف *** لا عند تتعب حالته النفسية
اجعنه امأيس بيه ما يلطف *** المولى ولا يهون عليه شوية
على الله مرته ولدها يعرف *** انه بوه في جداه دار خطية
وميزة الدنيا والزمان ايلف *** وصيورها تنزل عايه بلية
ايجي دور ولده ايردله السلف *** كيف ما زرع الشوك يحصد زيه

بدت عكسية راجل بقي خاتم في يد ولية الامووور يا صاحب بدت عكسي

يسلموا ايديك على هالكلمات المعبرة