قصيدة كنكم واهمين ..؟ للشاعر/ مفتاح الفالح كنكم واهمين ..؟

قصيدة كنكم واهمين ..؟ للشاعر/ مفتاح الفالح
كنكم واهمين ..؟ إن كنكم عين نا حاجب العين

يا لولاف

خلكم فِ النِّسيَّه والهجران وامشوا باي نيَّه

إلا أنا توّ قفَّلت القضيَّه المعترفين فيها باصمين

مقتنعين تهمتكم قويَّه محكومين حكم الخاينين

دمِّي حرّ دمِّي مو امويِّه وْفيّ إحساس وأنتم باردين

وْفي جوَّايا كامي كم سَيَّه وْكاظم غيظ كظم الكاظمين

مِ اللي لي واللي موش ليَّه وْمِ اللي فَّي مِ اللي غافلين

من ما فات مني مِ الخطيَّه واستنزاف للوقت الثمين

من تودير رجلي للثنيَّه مِ الشِّمال من بعد اليمين

مِ الوسواس والعين الدَّعيَّه من تصديق غدر الغادرين

من ما درت مِ اللي صار فيَّا مِ الهفوات مِ الذنب الرزين

مِ الشهاوات مِ النفس الشقيَّه وْبعد الب عن واعز الدين

من تأثير لفكار الرديَّه من تفويت نصح الناصحين

مِ الطغيان من قذف البريَّه وْاستحسان وَشوشَةْ اللَّعين

الجوهر شيّ والمظهر عريَّه الواضح موش ما كَنّ الكنين

من ترويج لشعار البذيَّه واستغلال صمت الناقدين

فيه أحيان يلحق فِ الأذيَّه لستنساخ للشعر الدفين

وْضحك الناس من شرّ البليَّه في اختلال وزن الوازنين

وْلقتباس جايز والعطيَّه اللي تُبَاح بين العاطيين

بالمشحوت والاَّ بالهديَّه فيه وْجوه تفرح بالثنين

وْضعف النصَّ والفكره غبيّه وانتشار جهل الجاهلين

فيه حقوق تهضم فِ العشيَّه وْقبل العصر فِ الجنب الحصين

وْبات الشعر يبحث عَ الهويَّه ضاع وْماع بين النازحين

والموضوع يقبل مسرحيَّه والكتَّاب تمُّوا منتجين

والديكور والطلَّه بهيَّه وْهم لبطال وأروع مخرجين

وفِ القرآن من ربّ البريَّه للشعَّار ذاكر تابعين

مِ الغاوون لكن ميش غيَّه اللي تنقال عَ اللي غاويين

واستثناه من نفسَهْ تقيَّه قوي لإيمان عكس الهايمين

وْقَلّ إقبال لعقول السَّويَّه فيه إحراج للي راويين

وأزمة ذوق وأزمة منطقيَّه مشتركين فيها واجدين

والتاريخ ذاكرته بطيَّه كلمة وين تكتب فيه فين

ينتج كم غلطه مطبعيَّه لاستعجال عند الطابعين

كيف عزوف لقلام الجريَّه فيه عزوف عند القاريين

حتى كان جُهينة ذكيَّه داخت نين تاهت عَ اليقين

كنكم ما تبالوا لْكم كم عام عني ما تسَالوا

معتقدين ديما كي اتغالوا تقسو غير تبقوا غاليين

ليش عليش عَ الناس اتَّعالوا وْفيش وْبيش عنهم زايدين؟

بْها لأسلوب ويش مني اتنالوا لاوالله راكم ذاهبين

ديرو راي والو ما اتولوا وْمن يالاي تبقوا طيِّبين

وْقولوا فيّ ياما فيّ قالوا غير خطوه قول القايلين

نا اللِّي انطول فِ اللي ما انطالوا اللي بالفعل ماهم ساهلين

كنكم ويش ساير تنسوا فيّ كنِّي ويش داير

نبِّي نقول يا نومي الطاير والاَّ نقول كنكم غايبين

والاَّ نموت والاَّ انبات حاير عطني كان كنكم صافيين

نا النظيف لنظاف الضماير ونا العفيف مرفوع الجبين

إن كان اخترت نختار المخاير هل لقدار قدري عارفين

إن كان احترت ناجد فِ الدباير إن جت للعرف سيد العارفين

يسري سِمّ في دَمِّي الفاير وين انحنّ يقتل في الحين