شاشن وين تاق

من طرف **dude333** 2013-11-08, 8:10 pm

شاشن وين تاق ... دون الخلق مكحول الأرماق ... له بالمكن

شاشن وين بان .... نور العين غايب له زمان

كنت نقول ناسي صوب كان .... وكنت نقول ماعد له اشواق

وكنت نقول نوار الجنان .... ذابل فيه مقطوع الأرزاق

و كنت نقول باع الصوب هان .... و دارن بيه ياسات وزماق

وكنت نقول لعروق الحنان .... القطعه خير من علقة شراق

ريته يوم في نفس المكان .... مانحساب عقلي له إنساق

شاشن من بعيد .... وقتاً تاق كي طلة العيد

مانحساب ينفض من جديد .... بذار دفين و ينبّت زراق

معاه نظرت كم وكم كيد .... معاه العقل كل المرّ ذاق

رهينة صوب كي حال العبيد .... مسلّم تحت سوطه والخناق

شاشن كي حضر .... ان قلنا شمس وان قلنا قمر

خلّى العقل في حالة خطر .... من تمويح واجد من فراق

ياما فيه جرنانا سمر .... ومنا ليل عانيته امشاق

ومن نيران في جوفي كبر .... خذاني سوق طايب عالأمراق

رهينة عمر عالياس انجبر .... يطارح فيه والموضوع لاق

شاشن له قباله .... حقّى كان مالعيشه بطاله

صوبه قبل دارنه امواله .... ربن فيه ياما من عناق

وما من وطن وتّن له اعزاله .... اطري ممطور نبته له اوراق

نصيب امرح كي دارت جلاله .... ارغاث اجلاد و السواق ساق

وقتاً حط خيبهن آماله .... امغير كلام ما منه وثاق

ارياح سموم دارت فيه حاله .... صياف العقل من مرباع باق

شاشن كي طروه .... وجن غيّار يشلن هوه هوه

كم نهّاي فالوطن اندهوه .... ردّ منين قابلهن حماق

حقّى العقل نصّاحه نهوه .... أقدع راه قدامك غراق

وهو منهد مابي لو دعوه .... حقّى كان يطرطش أرقاق

مصاوة عمر ضاعت يوه يوه .... فراس الرود ما طلنا إلحاق

من طول الغياب .... بلا تسبيب وإلا بالأسباب

ينوضن كيف ملحوق الركاب .... أو دونك حسّ راه الوقت راق

إلهن قفزات كي زوّا الباب .... مظلومات من حرّ اشتياق

علي الميصوف قشّاع الضباب .... إمّسّى برق يفزع له رواق

ضربت حساب جا دونه حساب .... وعشت معاه خارب فالمزاق

خبر عالخير عدّى في سراب .... وفيكم منو موح عزيز طاق

شاشن ماتقول .... له بالمكن مترادع الطول

وصفه فيه ما يكفي القول .... مولى الخد من لون الشفاق

صدقت معاه من جره حمول .... نشيل وكان يقبى لي اقناق

معايا عمر ماكان معدول .... ديما فيه لفّه وانزلاق

خطرها هبال وجّاد الحلول .... القربه حبل والبنقه غلاق

هناك حديث ماهوش معقول .... يبان معاه تقليب الأوراق

وهن ياراه ساقن سوق طول .... علي مدعاه مافيها رواق

يشوشن شوش فرسان الجفول .... نهار الموت تضرب في الأعناق

ونا ماعاد عندي ما نقول .... مفيت نقول شاشن وين تاق

من طرف عبدالكريم الشاعث 2013-11-08, 8:18 pm

مشكوور

من طرف **STAR** 2013-11-25, 9:31 am

منور على ما قدمت

من طرف العقوبي 2013-12-27, 11:02 pm

مشكور ع المجههود

شاشن وين تاق

شاشن وين تاق

رد: شاشن وين تاق

رد: شاشن وين تاق

رد: شاشن وين تاق