رد الشاعر صقر الوادي علي قصيده كونه ضاع ضاع 2010

رد الشاعر صقر الوادي علي قصيده كونه ضاع ضاع 2010


كوني ضعت ضعت العين ضلتني ونا تبعت
من يوم شوفته نوصل لحوشي نعت
العقل سهي وطالقلي الصراع
بين اثنين تفكيري فرعت
عقلي زين وعيوني أرداع
لكن وين بلفتاته ألتعت
وجاب وزين ينسني الاوجاع ضاع العقل وفي سباه ضعت بعرف ودين دارت له قناع
بنت أجواد نبتة خير نتبت
قلب وعقل مع عيني انزاع
مانلتام ياصاحب سمعت
قول قديم لازم من وداع
وجعه شين ولعقلي رجعت
كي بحار مكسور الشراع
في زرقاي خزراته غرقت
حياتي فيه وبه ننجا أساع

قصيـــــــــــدة
كونـــــــه ضـــاع ضـــاع...


الشاعر "السنوسي الحمري " مدينة سبها قال

كونه ضاع ضاع .. جريت وراه حد المٌستطاع .. وما لايمت
..
وبعد ذالك طرأ تغيير فى راس البيت وأصبح

كونه ضاع ضاع .. جريت وراه حد المٌستطاع .. افراقه صار

وكانت المُشاركات

الشاعر " السنوسي الحمري "
كونــــه عك عك .. وكونه امعاى خبل ماسلك
ماسلمت راهو انفك فك .. جنين الكبد واخذانى امزاع
انحوس اتقول حاصل فى شرك .. انفك ايدى تحصلى اكراع
..
الشاعر " امحمد الغزالي بن عيسى " بنغازي
كونــــه راح راح .. وكونه فقد فعل(ن) فقد صاح
وكون اترد لايام السماح .. ماضنيت لاضنيت باع
ارياح القسم لطنهن ارياح .. وصاف غلاه فى عز الارجاع
ونى مازلت معقود الجناح .. انراجى فيه من يوم الاوداع
وهو بغلاي مطلوق السراح .. انسى ما صار تحلف ما التاع
*-*-*
كونـــــــــه خف خف .. المي والملح خف بما حلف
وكونه صف دونه ياس صف .. انصارع فيه واقدرني الصراع
لا عراف شاكيته عرف .. ولا فزاع منه جن افزاع
ولا سلمت فيه ولا صدف .. ولا للقسم طعت امنين طاع
صهدت الكبد وين الدمع جف .. رجية عمر ما تقبل اوداع
علي ليام خليت السلف .. ايردن فيه كيل الصاعصاع

الشاعر "ناصر العقوري " إجدابيا
عارك لين طاح .. عليه العقل لاكن راح راح
صبا دون يأسه بسلاح .. امغير خداه منا بالذراع
أونا تميت فى مصفق ارياح .. ابقى لليأس صوبى بالجماع
اهموم الوقت درانى امراح .. من رايات مبهوت الخناع
اتحوش اليل وتمد الصباح .. ردن فى كيل اللوح صاع

الشاعر " سالم الدرياق " سرت
درته اللى قدرته .. وكونه ضاع وخسرته خسرته
ووين ايست من قربه نكرته .. طبعى حار نرفض لنصياع
بدا بالغدر لكن ما غدرته .. بلا ميعاد هان الود باع
كميته سر فى عقلى طمرته .. خفى عالناس لو وصلوه ذاع

الشاعر "الشريف الشارف الحرنة " إجدابيا
ما فيها ندامة .. بلاه انحمل ننساهن أيامه
زمان الوصل ما اقصرهن عوامه .. للطماع ما فيهن أطماع
امرار الفقد متجرَّع آلامه .. والجراع يلوي في الذراع
فقد أجواد ماتوا ع الكرامة .. أطوال الباع في زين الطباع
لْهم في الناس لو دوَّرت ياما .. نريد ارداع ما نلقى ارداع
وما من وطن متمازي حزامه.. طوايف رفض خلنَّه امزاع
عامر كان بأصحاب الشهامة .. يحاموا فيه من خوف الضياع
ان صار لطام ما يهابوا لطامه.. وان شحَّ المير طعَّامة جياع
ما أصعب يوم تنكيسة أعلامه.. ما من قلب من هوله التاع
شاخوا فيه قطَّاعة أرحامه.. اللي من قبل لخصومه أتباع
بيت العز قلاَّعة رمامه .. لقينقاع ياما من أشياع
قنو السو متمادي إجرامه .. وجهه بشع ما فوقه قناع
ضنا لجواد جضَّوا من أحكامه .. أحفاد أسباع دالنهم أضباع
ما من طفل ودَّع الابتسامة .. وأم تنوح ما جنهم افزاع
واندال الصقر نفاض الكمامة .. لا للشروط عدوانه انصاع
بهر الأبصار في لحظة إعدامه .. مشهد فخر في لوطان شاع
وقفة عز زاداته فخامة.. لا مالحبل شوّب لا ارتاع
بالتشهيد صرح في ختامه .. علامة خير ما فيها انزاع
يا بغداد عاقبتك سلامة .. فضل الله بيبانه اوساع
مهما الليل يطاول ظلامه .. ان تاق الفجر يأذن بالوداع
باذن الله تنزاح الغمامة .. بعد لقهار وسنين الصراع

الشاعر "عبدالقادر بكار العوامي " بنغازي

كونه صار صار .. هذا قسم ماعندى خيار
والمكتوب ما منه فرار .. وأمر الله نقبل باقتناع
جرحه شين طبابه احتار .. والتضميد ما هاون أوجاع
وفالمكنون ما طفيت النار .. لعند اليوم من يوم الوداع

الشاعر "أبوبكر بوحويه " البريقة

كونه فض فض .. غرض من كان للخاطر غرض
في دنواه لاطشني الحظ .. مشي بالقسم ما هو بالدارع
يا لو فيه مزالي معض .. ما سيبت سفاي لقناع
لاجل فيه ما نقبل عوض .. وفي سباه ما انهاب الصداع
غير ايديه من ديا نفض .. اجهار نهار من شاريه باع
والي اتنين فيه اتقض قض .. غنوه اوحود كانولي اتباع
لو كان غير نابى نتعض .. ما ننحطفي خانة اضياع
نا في ايدي من غيرة انعض .. انغالي غير في نفس الطباع
اعطيلي عهد قبله وانتقض .. فيه ابردن نيران الاخداع
ابذار اوفي حتى كي رمض .. سوايا رد كل أمخلب صاع
وشلت الحمل كي فوقي انشظ .. حتى كان لاحقني أضياع


الشاعر "عبدالسلام بلحاج المقرحي" وادي الشاطي
كون كان كان .. كيان وكون فى كون وكيان
وكونى كنت له حد الامكان .. نكون حريص فائق لأطلاع
على ما فيه من سر وبيان .. وما يحاك ضده من أطماع
انخاف عليه من زلة السان .. عليه وفيه رافض لأستماع
وكونه كان ماكن فى المكان .. اللى مابين صفات لظلاع
وكان نسيم طارد للأحزان .. نقى ما فيه شى بلا صطناع
وكان ربيع زاهر بالحنان .. عفى للعقل شاسع لأتساع
وكاد يكون هو شط لأمان .. لولا فعل موجه بالشراع


الشاعر " علي عبدالهادي " سبها
كونه راح راح .. وكونه طاح بعد العلو طاح
ولكن موش فى وين استراح .. ولافى وين تبتله اكراع
وكونه لاح بعد اليأس لاح .. وحاذف عن مخافيه لقناع
وكونى كنت مكسور الجناح .. وحلمى فيه من كاره انباع
خذنى عن مولاته ارياح .. وشلت اللون لابيض بأقتناع
وكونه فى عايش قول صاح .. وماعد لى فردوده أطماع
وكونه كل كلى مستباح .. أكيد أكيد ما فيها اخداع
ونيسى غير ما صادف صلاح .. الله الله والدنيا متاع
وفى ما صار عاطيه السماح .. وخير الله ما فيه انقطاع
..
كونه طار طار .. وكونه جار فوت الجور جار
وكونه حرق يحرق حرق حار .. سرى بسموم بسم الله شاع
وكونه دار فينا دير دار .. مشوكل شرك ويزيد اتساع
بلى عالوقت ما رد اعتبار .. غلانا فيه سالك صاع صاع
ابقيلى نار ما تطفى ودار .. لها ما عاد عندى طول باع
..
كونه لط لط .. وكونه حط فى وين التهط
وكونه حلم بضياعه سمط .. العقل بنار وهموم وضياع
وكونه كان فى جلوة الشط .. وغافل عن مفأجاة الأوضاع
فرمشة عين فى غارق خلط .. اشرق ما طق فى مد الذراع
لمن خلاه للعازة ايلط .. وغيب قبل لايقول الوداع..


الشاعر "عادل شحات " إجدابيا
نجرى يالحمرى .. غير شقاى ضاع وضاع عمرى
قلت القسم فيدى طاع لمرى .. غير القسم لمر اليأس طاع
نطمر فيه فرقت حال طمرى .. سرا شاع بين الناس شاع
واللي قلت بين ايدى وغمرى .. هان غلاي بيع اطلوق باع

الشاعر " مفتاح الفالح " إجدابيا
كونـــه كــان كــان .. جريت وراه فى حدود الأمكان
مامن تو ساعى من زمان .. انقول اساع يوفيلى اساع
كميت السر لكن بان بان .. بوبح بيه بلعانه اوشاع
خلاص ارتحت من قاسى اوخان .. وفتكيت من لوى اذراع
عليه أدمنت خلانى إنسان .. أيعيش ابربع من أربع أرباع

..
الشاعر "بوشناف الشلطامي "

كونه طاش طاش .. اشرب لرياح ما فيها نقاش
ايحوش ان كان ريم الفج حاش .. وهو بالعين ينظر فى اسباع
ونا تميت ندفع فيه كاش .. رجاه دموع كى غيث الأرجاع
اللى هو كان هو حد الحواش .. ونجحد فيه صوبه ما انذاع
امفيت ارياح فى الدار اتناش .. وجرة دبو فى قولى اضباع
الا هاضاك زوله ما طشاش .. على لنظار يلفا لا اساع

الشاعر " عبدالسلام بوجلاوي " بنغازي

كونه فات فات .. زمان غلاه واللي فات مات
وكون الفكر با اسبابه شتات .. راح ارياح من يوم الاوداع
وكون الصغر عدن به أوقات .. شباب العمر والبرطاع طاع
غزاه الكبر باصياف النبات .. واحصاد الزرع وادراس الاقياع
قعد حتحات فاضل ما لأحتات .. وما صفوه من غيره اشباع
والشبعان حتى فالفتات .. بطى فالفت للناس الجياع

الشاعر " محمود العبار "
كونه طار طار .. بين ايدى فى عز النهار
بوجنحان مرفوع المطار .. نكر داعيه مو ناوى ارجاع
ترقص فوق واللى صار صار .. بكل فيه ماعندى اطماع
حد عزاى سيلن يا انظار .. ادموع اتقول سفوه فى ارجاع
افراق اعزاز نالقنا امرار .. سوا تخفيه والأ كى انذاع
حتى كان من واطى النار .. له لخرين ما يحسو أوجاع

الشاعر " سالم العوكلي " البيضاء
كونه صار صار .. افراقه مر واخطوره امرار
وراه العقل حايس فالمدار .. وضاقن بيه لفجوج الاوساع
كي من خشفي صحراء وحار .. وشور اعربه ما جابه اكراع
ولا ليمين عارف من ليسار .. والأرض ابرمة واشوي المتاع

الشاعر " عطايا الصبحي "
ضاع وعوزوني .. أصحاب عقول كانوا يفهموني
معاكن الاذن سيلن يا عيوني .. كان الدمع يبري في الأوجاع
كميت مغير بانت في جفوني ..صبر العقل كامل من افجاع
فقد أجواد هم لي دقدقوني ..أصحاب الصيت جوهر باللماع
أبعاد البوع ما هم كي الدوني .. في ما فات كانوا م السباع
ركَّابين جيَّد مو حروني .. وينيفز ديره جا امزاع
عليهم دوم سايل بهدلوني .. وكم خويل خايب غير طاع

الشاعر " محمد الشيخي" .

راضى بالخساير .. يالى فيك مافادن ثماير
حتى كان مانى طير طاير .. لى اجناح يهوى الارتفاع
وعندى عقل مو ناقص دباير .. وعندى وجه ما يعرف اقناع
ولا امخصوص ننزل دار باير .. ولا ننجر فى جرت اكراع

الشاعر " عبدالله ارحيم السليماني"من سبها
كونه غاب غيب .. وكونه كان يالايا أقريب
وعاش امعاى لين الرأس شيب .. وله ثأتير عندى واندفاع
بنحاكيك رانى يا احبيب .. افهم زين وأحسن لأستماع
جانى صهد لين الكبد طيب .. وكم من يأس جا دار اجتماع
ضهرلى حلم لكن حلم طيب .. امغير الحلم خاتمته ضياع
..
كونه راح راح .. وكونه ضاع شالنه ارياح
فيه العب يأسى واستراح .. وخلا الجوف مطرطش امزاع
يخدم فيه خدمة بالركاح .. لو عجول لاهو بالأوجاع
ولو بالجهد لا هو بالصياح .. أو لا بالمال ولا لانصياع
انديروا شى ما هو مستباح .. ونجروا جرى فوق المستطاع
الشاعر محمد الممهور :الناجحي

كونـــه غـــاب غــاب .. و كونــه فــص ملــح و ذاب ذاب
و كونـه فيـه خــاب الظــن خــاب .. و كونــه طــاع للعـــدوان طــــاع
و كونـه ساب عهد الصوب سـاب .. و كونـــه لاع قلبـــي بنــــار لاع
سـراب و كنـت نحسابــه شـــراب .. جريــت وراه ضيعنـــي ضيــــاع
كونــه خـص خــص .. و كونـه قـص حبـل الــود قــص
و كونـه غـص قلبـي بـداه غــص .. و كونـــه بـــاع ودي راه بـــــاع
شـال النــص خلانــي بنــص .. مركـب دون دفـــه لا شــراع
علــى نغمـــات عبراتـــي رقـــص .. ونـا مجـروح نشلـى مالا وجــاع
كونــه خـــان خــــان .. و كـونـه بــان قــل وفــاه بـان
و كونـه كـان نـور العيـن كـــان .. و كــان الفـرح وبليلـــي شعـــاع
و كونـي كنـت غـارق فـي الحنـان .. كنــت مغيــر حنانــه خـــداع
اللـي راعيــت مـن طيبــه الـــوان .. راح الطيــب كــي طـاح القنــاع
زمـان الحلــم عــدى فــي زمـــان .. اليـــوم وداع يـــا صوبـــه وداع
نهونـه كيـف ماضـي العهـد هــان .. نــعده ضبــــي حازنـــه اسبـــــاع
شـلايــا راح مـا بيــن الأسنان .. و دار الــدم فـي التربــه نقـــاع
مغيــر كـلام مــا فــات اللسـان .. غــلاه اورام سرحـن فـي النخــاع
نخـاف معـاي يبقـى فـي الاكفـــان .. و يوم الحشر يمزعنـــي مــــزاع
كرهـت الروح و كـرهـت الإنسان .. اللـي فـي الـروح نازعنـي نــزاع
زرعتــه فــرح عقب لـــي أحزان .. رفعتــه علـــو نزّلنــي القــاع
رغــــم القـــو قدامـــه جبـــان .. و رغـم الضعـف قدامــي شجــاع
حتـــى بعــد فارقنـــي و خـــان .. مابــى يهــون بو عيونــاً اوســـاع
خيالـه تـم ساكـن فــي الاجفـان .. و صوتـه يـوم ما فــات لسمــاع
نشـم اريـج عطــره فــي الابــدان .. نحـس بلمــس كفّــه فـي لصبــاع
بـدت لوطـان فـي عينـي اوطـــان .. بــلاه اجــداب فــي عــز الربـــاع
يـــا مـــولاي يــا عالــي الشــــان .. مفيتـــك راه مــا للنـــا افـــزاع
إلهمنـي الصبـر وعزومـاً امتــان .. راه القلــب ضايــق بالاضـلاع
و فــرّج كــرب عبـدك بالإحسان .. جــدب ليـــام هاييلـــه ارجــاع


الشاعر:عبد الرحمن عابد بوجازية - إجدابيا

كونـــه صــــار صــــار .. اضيـاع كبير في وضح النهـار
وْفي لنظــار ما من بصـر دار.. شيـنـك يوم يا يوم الــوداع
صعيب صحيح يا فقد الكبــار .. اترق العزم وتْخلَّف أوجــاع
ويْجيب الشيب حتى للصغــار .. وقليل الشيب فاللي ما ألتــاع
وأيام العمـر لو طالـن أقصـار .. يجيهن يوم ينتهين السَّـــاع
بعدهن فيه جنة وفيــه نــــار .. وأن صار الضياع هَذاك الضياع
اللــــي للبعث ما دار إعتبــــار .. بْسوم بخيـس نلقانا أنبـــاع

الشاعر: صالح محمد دواس - إجدابيا
كونـــه جــم جـــم .. د معي نيــن م الماقـــي خرمْ
واللِّي فات في فكري برمْ .. واللِّي شين هو يوم الوداع
هيعند أيش نشري فـ الندم .. إن كان الصبر قالوا ليِّ أنباع
والذلاَّل عمره ما زدمْ .. أن صار اوخاذ حقَّه بالذراع
والفرسان لا ملطم ارْسمْ .. يزيدوا بتع ويجودوا أسَّـاع
فيهن فرق حتى وهن لحم .. قلوب الضان وقلوب السّباع

الشاعر: أبوبكر رابح القرقعي- إجدابيا
كونه راح راح .. وراء مجهول ساقنَّا ارياح
يْريد الصَّاح ما لايم الصاح .. وعلي ما فات موْ سافي اقناع
وكونه طاح فــ المحظور طاح .. وسِرَّه شاع بين الناس شاع


الشاعر: عبدالله القراب - مصراتة " ابوريان "
كونه كان غالى .. وكونه العهد ما يرضى بدالي
كونه حلم بيحقق امالى .. وكونه هدف ما يقبل ضياع
وكونه نعز في قدره العالي .. وكونه العند ما يحل النزاع
كونه أحداث ما كانن في بالى .. كونه الأمر يحتاج اقتناع
وكونه البحر في مدا العالي .. وكونه الصح تغييرالشراع
وكونه الجد مهوش تسالى .. كونه الحزم ما يبى قناع
وكونه طاح من برج العلالى .. استخسر في نظرات الوداع
كونه ما قسم .. وكونه ضاع عيشنى فيهم
وكونه العقد من بعد التتظم .. وكونه راح مابين الصباع
وكونه بكاس جرعني السم .. وكونه لدغ من أشرس الفاع
وكونه قال وافقنا نعم .. كونه بيه سلمنا انصياع
وكونه بعهد ما يوم التزم .. كونه الحب ما يعنى إتباع
وكونه الحظ في لحظة برم .. وكونه غرقت لامستا القاع
وكونه العزم ما يوم نهزم .. إرادة صلب ليه خبرة وباع
كونه ما يعود .. وكونه راح حازنا غرود
وكونه الغدر والأقسى الجحود .. وكونه الشد من وجع الذراع
كونه الصبر را عنده حدود .. وكونه الفرق في نوع الأوجاع
وكونه عشت أياما و سود .. كونه لين قطعني قطاع
وكونه الخوف ديمه من الحسود .. كونه الحسد من شين أطباع
وكونه الحب من يوم الوجود .. كونه إحساس وجداني متاع
وكونه الصدق والقلب الودود .. وكونه العفو من شيم الشجاع
وكونه العمرفى أيامه عدود .. أنا سامحت واللي ضاع ضاع


عيسى بالحاج المقرحي وادي الشاطي
13 يناير 2010م


كونه حي حي وكونه لي توا موش لي !
وكونه شى قاعد كل فينا رغم جديت الصراع
بين الحلم و الواقع السي و رغم ضروف ميدان النزاع
اللي مافيه طاحت من دوي اطلاق النار ظاربها اشعاع
والجرح قوى وايمانى قوي قو العزم يلوى ف الذراع
جنودالله فى مسري النبي اطفال اصغار فى صيفةااسباع
هواجوس رعب في الدنى وهلهم فى لعماله للنخاع
وشوف الخزى عالوجه الخزي وكيل النقل فى الصنف المباع
ويازكار رقصهن اشوى اللى عالعرظ ماعظن اصباع
وسل سيوف كركار العبي وهز اكتوف نخاخ القصاع
وقاوو قبع بندير الفقى ونادو غير القطع بوكراع
انباع الوطن ولدم الزكى وهى يا دين ماوباخر واع

الشاعر : اسامة المقرحي (السامر) وادي الشاطي


كونه فات فات....وانا وين بعزومي نبات
سل غلاه كي سل النبات....من لجدور من قو الدراع
من لفجار ليا عند المبات...غصب علي طايعله طياع
كان رضيت خايف من الشمات...وكان جفيت خايف ملوجاع
حكم علي نبقا في الشتات...ني وياه ديمه في النـزاع

كونه حل حل...احبال غلاه ماشاور سأل
وانا نقول ماضنيش مل...لاكن شاف غيري من انواع
غرت بيه الدنيا بزلل...اتستكتر في العيون الوساع
ترك العلو وبروحه نزل...غير طمع وزلت صياع
فراقه صابني بشلل...ونار غلاه تدلع في لداع
تركني هك ماهو بزعل...علي مادرت رافض السماع

كونه مد مد...مو حاسبش احساب حد
بكل عزوم عطاني اليد...خدي السموح وعدا بلوداع
دعيت الله يبقاله سند...بعد مافيه طمعه لاطماع
يجينا يوم ونديرو جدد...وننسو قديم حد المستطاع
ولكان قديم عليا نشد...قول خلاص انسيكم وباع
الله كريم وبخيرا يبد....يجي الشبع من بعدالجياع

ونخبة أخرى من الشعراء لم يعرف أسمائهم


الشاعر " ........"
كونه هام هام .. وفى الهيام ليه اليوم عام
تباعد خش جوا فى الظلام .. تهاوا صار تحت القاع قاع
هزى عالنصح وهزى عالملام .. واللى ما يوم ريه طاع طاع
حياته فلم من جملة أفلام .. الدنيا دين يخلص صاع صاع
اقباله مات ما همه الآلام .. جنين الصوب يثغا واع واع

الشاعر " ........"
كونه ذاب ذاب .. ذوبة ملح فى طاسة شراب
وفيما جد ما جاء فى أحساب .. لغا مدعاه بالى با أقتناع
بعد سافيه دون الدار ثاب .. وبات الدرب مالفا للفاع
ارياح اليأس كاسيته تراب .. بحر ريغان ما اتخشه كراع
قل البخث هو راس الأسباب .. ولط القسام هو سر الضياع
حبيب الروح ما كيفه أحباب .. ولا ظنيت ناجدله ارداع
سواد الرأس من مطره شاب .. اللى عالعين غايب والأسماع


الشاعر " ........"
كونه فى قصر .. وكل نفيس من ذاكره كسر
كونهجد جدى ما تحسر .. ما هماش لابيا استاع
احسبته لى ثاريته اينصر .. يدعى امعاه ضدي كل داع
اوكونه فى يربح كان خسر .. عشرة وقت ناقصها اجماع
جى فى الحلم لكن ما اتفسر .. انى مجثوم وانفاسى اقطاع
اوجانى خوف فيا لين جسر .. على لكراع ركبتلى اكراع
..

ان شاء الله تنال اعجابكم تحياتى

مشكور على هذة المشاركة الجد قيمة وانت دائماً مميز بكل ما تأتى بة من جديد ورائع موفق وفى انتظار القادم منك واكيد القادم اجمل

روووعة تسلم ايدياتك