تلاقن مشراف ونسرين

تلاقن مشراف ونسرين .. نهاية عطلة نص العام
بعد غيبة قيس اسبوعين.. وراحه م الفصل والاقلام
هذي تنشد في هذي وين.. ووين قضيتي هالايام
حكت نسرين على البحرين.. ورحلتهم لعند الشام
وقالت سافرنا للصين.. وسافرنا لامستردام
اللي معايا ماما وحنين.. واريج خطيبة وسام
اما بابا ف الارجنتين..معاه عمو وبنتا سهام
وقالت جابنا سيديين.. وكرتونة شرطان افلام
وجبنا جهاز التلوين.. عليه اموصي خوي عصام
وماما جابت فستانين.. لخالاتي هند وهيام
وجابت لجديده جوزين.. حدايد وسوارة صدام
وحضرنا حفلة ملحم زين.. ووليد وكاظم واحلام
وشفنا زفة سوريين.. الدبكه بالطبل والاقدام
وف الصين القينا وحدين.. شرينا منهم ريش نعام
وزرنا كتحف في بكين.. وزرنا مدينة الاقزام
وصورنا غادي فلمين.. شرت مما لوحة رسام
ثمنها بالدولار الفين.. اللي راسمها هو كنجام
احسن ناس الهولنديين.. احترام وذوق ونظام
قضينا عطله مبسوطين..ايام سعاده وانسجام
ويامشراف مشيتي وين.. اكيدا جوك كان تمام
حكت مشراف بصوت حزين.. ومافي نيتا الكلام
وقالت نا واختي سالمين..عمدنا عيت خالي خمخام
وودنا خويا حوسين.. معاه ولد سيدي شمام
مقبل عيت خالي نازلين.. حذا وادي رزق الفحام
براريك اكبار وبيتين.. ربيع بنوهن لقدام
وصار اطهار ولد جبريل..وتمت زيطه سبع ايام
وجابوا فرعة غنايين..ايغنوا ع النار والاوهام
ويطروا في ضاوي الجبين..الغالي بوممشوط عرام
غنايا واللي مرهونين.. اللي صوب غلاهم مادام
اللي جو بالدار بعيدين.. اللي منهم عقلي مانام
وقالت سجلت شريطين.. غناوي ياس وشي ملام
بعدها صار مجلم زين..وماغاب علينا جلام
تريس بوادي هاجيين..ارحم هالطوقه يارحام
ذبحجنا ليتها شاتين..اسمان وكثرنا الطعام
وطولنا واحنا وعيين..قمر زاهي ماهناك ظلام
اللي تخرف خالتي حاملين.. على صابة هاضاك العام
ورجعه قالت خرفتين..على ام بسيسي وام عظام

هههه عليك بخت
مشكور عالطرح الرائع
تقبل مروري

نشهد بالله الامنورة البنية نسرين

تشكر يا بركة على ما قدمت وفى انتظار جديدك يا طعمة

تسلم