لا تطريها

من طرف **العاشق الصغير** 2011-12-06, 3:55 am

قصيدة لا ,, تطريها

سلتك سوال الله لا تطريها
العين بينها وبين البكا خليها

سلتك برب العزه
ونكان بينا ذرة وفاء ومعزه
العين من سبيب زمانها ملتزه
ومتومج الها مازال متكفيها
من خوف يسبقه حزاز بيش ايحزه
ويردع بلاه وحقها يعطيها
لكن انزالت قادره عالفزه
اتشيل حمل حاضرها على ماضيها
ما يهما فى شيل حمل اتهزه
وشيل ثقل ماتحته اوقى يحميها !!
حتى انكان واعر عالسنون القزه
رحات غيضها ترحي اللي تبيها

بيش اتسالها ؟
خليك انت فى حالك وهى فى حالها
هال الحايسه قاطع الياس آمالها
ربيع عزها قلوها ومقلويها
وكابس عليها ضيق ضيّق بالها
امرار من قطير الحنضلة ساقيها
عليها قرن غيّب اسنين دلالها
قرنت جدب بارم ابها عاميها

لا تقربها
خليك انت فى حالك وهى سيبّها
العين عندها ساعة ابكا تسحبها
خاطى ابكا لوعة غلا كاويها
بعيد فالخلا تغرد على شاطبها
اسنين عمرها عدن شقا ماليها
حسايف عللي ضرها ونكبها
من سوقت زعازيع الزمان عليها
لا تلومها ,, خلوت الدار سببها
وغيبت اوجوه اسماح كانن فيها
وشان وجها لط الزمان قلبها
نين جاب سافيها على عاليها
ما تقول شى كانت ايام عربها
هال الخالية ,, ودك امغير اتجيها!

سلتك بوجه الله لا تطريها
العين بينها وبين البكا خليها
--------------------------------------------------
وسلامتكم