نبيــــــــــــــها ليبيــــــــــــه...

من طرف شموخ انثى 2012-01-21, 2:03 am

نبيها ليبية

مانبيهاش سورية ولا لبنانية
... ما تملى عيني الا الليبية
نبيها ليبية في القلب تعز عليا
... ... في الحوش نتعاركوا وتعيط عليا
وقدام الناس اتحبني وتموت فيا
نبيها ليبية عند امها تقرّم فيا
وقدام صاحبتها العانس تتباهى بيا
نبيها ليبية على الطلوع تنق عليا
وكل يوم برجالة صاحباتها تقارن فيا
سمية راجلها جابلها ثلاجة أصلية
وكان تشوف طقم الالماس اللي شراه لفتحية
وانت حتى في عيد الحب ما شفت منك هدية
يا مرتي يا ليبية هاذو يكذبوا عليك باش يفسدوا عليا
اكذبي عليهم حتى انتي وقولي انه مش منقص شي عليا
وقولي كل سنة نصيفوا في اسبانيا ولا تركيا
وكل عام سيارتي يغيرلي فيها من مازدا لكيا
نبيها ليبية تصرف هلبه وتفلس بيا
ما يهمها تشحيطي في الخدمة ومبهدلة بيا
نبيها ليبية عسل وأحلى من الشامية
يكذبوا عليكم مافيش راهو أحلى من الليبية
نبيها ليبية ... الليبية انحبها وانموت فيها
نبيها عسولة بنغازية
ولا من مصراته لو نزعلها خوتها يهدوا عليا
ولا تكون من الزاوية الآبية
ولا حتى من الزنتان ما تخون ولا تنكد عليا
نبيها تكون بيضاء جبالية
ولا تلوح كلمتين امازيغية ما نفهمها نبيها زوارية
ولا تكون جوها مليح طرابلسية
ما يهمنيش تكون حتى غدامسية
المهم نبيها تكون ليبية

تعيـــــــــــــــــــــــــــــش المرأه الليبيه دوما ابيه’’