حالك مش عادي..متلخبطة متفلوجة متملحة يا بلادي...

حالك مش عادي
متلخبطة متفلوجة متملحة يا بلادي
واحد يقول ثوار واحد يقول مسلحة
واحد يقول تعدلت و واحد يقول متملحة
واحد رافع ايديه ويدعي وعلى الله عابي
واحد ايقول انثورا انديروا يوم شبابي
... انثورا عالفساد و عالسرقة و المتسلقين و...و...و...
انثورا اتقول اسبابك وانا انقول اسبابي
واحد يقول اعتصمو واحد ايقول مظاهرة واحد يقول
انثوروا و كيف عقاربك يا الساعة نحنا قعدنا اندوروا
واحد يقول حرية واحد يقول وطنية
واحد يقول مستقلة والاخر في قلبه علة
من موت الشباب اليومي في سبها و من يوصله
والسبب فتنة شراذم طاغي لادين له لا ملة
واحد يقول اعلام واحد يدير افلام واحد
يقول مش حرة على راسها شمام
واحد يقول حكومة واحد يقول حوار
ويطلع جريح في الصورة يقول حقي طار
واحد يقول حريقة والاخر يقول تهديم واحد يقول دستور
واحد يقول بلادك بصلاحها يا شعبها منصور
واحد يقول مدرستي واحد يقول جامعتي واحد يقول
بنغازي واحد يقول زنتان و جرحى تنادي بحالها
المدهور في ليبيا و مصر و اليونان
واحد يقول اسلامي واحد يقول ليبرالي واحد يقول فيدارلي
والاخر يقول انعيشوا كيف ماعاشو زمان اجدودي
واحد يقول للمجلس استقيل كان مش قادر تحمي حدودي
واحد يقول نحتفلوا و الاخر يقول حرام
واحد يهدد يحرق يقتل ايدير إجرام
واحد يقول مجلة واحد يقول صحيفة واحد يقول
جريدة واحد يقول جمعية
والاخر يقول بلادي فيها نفط بلادي بلاد غنية
واحد يقول دينار واحد يقول دولار واحد يقول اليورو
و الحال هوا هوا كيف عقاربك يا الساعة اندوروا و مازلنا اندوروا
لكن شفتها ضحكتهم ومنا من شم المسك في دفنتهم
اللي دمهم روى البلاد وقالو للظلم لا.. دمهم عمره ما يضيع هباء