لابير ولا قلتا رينا..

من طرف قمر الشعر 2012-04-10, 10:40 am

لابير ولا قلتا رينا....منها روينا....غير اجداب الوطن لقينا

لابير ولاذود هلب....وريح تهب...ولامازق بامطار سكب

بخضرة دير ايدير قلب....عليه ان جينا....حس رعود صدا في حينا

لكن ويش تقول عجب....نجوعه وينا....الوطن الي كاين حامينا

اليوم ربيعة غير جدب....صهيد علينا....يوم عمود عجاجه شينا

حتي الي يجيه ايغرب....نسا شرقينا....انظر وين ساق رحالينا

جاه الضيم وجاه كرب....ميول سنينا....الوطن الي بخيره زاهينا

لابير ولا غوش نظرنا....وان حدرنا....شور الوطن الي مصادرنا

سماح دروبه كان عبرنا....وين لفينا....عينك ماتشوف الا الزينا

بهب نسوم ونار كبرنا....ون غنينا....عالصوب نحايو الدفينه

الي منه ليلات سمرنا....مامن شينا....في الخاطر ماعاد برينا

هك وهك الياس جبرنا....حاتم فينا....لذعات وموح ملاقينا

لابير ولا نار شعيل....بين فجوج تبان لهايب

لاكوت ولا حس هديل....داير في لدروب طرايب

وين تواره هالهميل....وين رحيلك يام جنايب

وين الدامي بوكمبيل....وان تعلا دار عجايب

وين تواره نجم اسهيل....ولن غطنبا الضبايب

شلاظيم ايشلن في ليل....مع سفوة لرياح هبايب

رعد يرزم دار مواويل....ثاب الوطن وشال ترايب

سريب ايذيبل هد الحيل....خلف في لوطان خرايب

الدنيا تضحكلك وتشيل....كل الزين وتلقي خايب

والي تقول عليه عزيل....كولاس وغطراس نوايب

والي تقول عليه اصيل....نميمة بين الناس ايعايب

منها ماريناش سبيل....غير الهم علينا جايب

نيران اتوقد بالحيل....في الخاطر ماخلت صايب

نذكربوممشوط طويل.....فوق اكتوفه طاح هضايب

الشفه حمرا دم قتيل....قير جبوح عليها ذايب

خد ملهلب تاق شعيل....شفاق غروب ايشد جذايب

هدب وماقي بالتكحيل....مع خزرتها عين الطايب

من يومت فرقاه ضليل....تايه في لوهام وسايب

يهطل دمع العين ايسيل....اللوعة للولهان عذايب

لا غالي لاوطن ايشيل....الهم علينا....ولا قرطوع دوا يبرينا[/size]

الشاعر( بوبكر علي العرفي)[/center]