مختار الطاهر الغول: طرابلس يا طايحة السعد والمزّال (2)

من طرف **dude333** 2012-06-03, 7:08 pm

3/6/2012 00:20

وين لمتكم يا نسوان فى كل عشية فى حوش واحدة من الجيران
تضربوا فى اللوقنى على عالة شاهى والثالثة بالكاكاوية والا معطره بالنعناع
مع كعك مالح وخبزة شعير والبشماط وتبدأ الهدرزة الزمنية
يا وخيتى ما سمعتى فلان خطب فلانة بنت الجيران وجابولها البيان
بيان مقوم ما نقصاته يبره وجابلها كبش ملويات قرونة ملبسينه تستمال حرير وسوابيت من كل شكل ولون
هذا اللى شافاته عويناتى اللى بياكلهم الدود والتراب
هذى بدعة وطواقة هذا بيان والا قفة
ويا خويتى تستاهل البنية سمحة وبنت وصول وعفة وخير من خزنة مال
أنا سمعت قالوا يحبها وتحبه ومستعد يصرف عليها دمة
انى نقول ليش جو خطبوها وقالوا لهم البنية بتكمل قرايتها
البنية يا بنياتى تحل العين المغمضة والولد تحطيه على الجرح يبرى
وكل واحد ربى يقوى سعده وانشاء الله بعرسها تتهنى
ربى يقوى سعد بنياتى ويطيحهم فى راجل زين وباهى
أنى لا نبى لاذهب لافجرة نبى نفرح ببنياتى والله همّ كان البنت تقعد فى الرقبة
تحلحزلى من مكانك يافطيم فال الله ولا فالك شدى فى الله تو اجى النصيب يخبط بابك
وكان نحكيلكم شن صار فى حوش مرومة
مش قالوا ضمت حوايجها فى صرتها ومشت لحوش بوها حرجانة
خيرها شن صار لها قليلة العقل والا انذهبت شيرتها
بالله فكونى منها هاذى تتزعبن وتتغلى وما فيه شي عاجبها
شفتوها فى عرس فلانة صدارة والمروحة فى يديتها مدندشنة بالذهب لركبيها
وراجلها مسيكين يزازى بيها وشيبانيها عطاها العلى كله تتفدرج فيه هي وراجلها
وعجوزتها ما تناشب فيها وما ترضى فيها دقة شوكة وتحن عليها كيف بنيتها
لا يا وخيتى الهنى باهى والراجل سترة وخير من شماتة الجيران هذا كفر بنعمة ربى
هذا بنادم ما يعبى عينه غير الدود والتراب وكانه راجل محصحص يطلقها
شن قعدة دير غير تزل بردى الحرير ومسوكة ومحرقصة تقول عروسة
واليوم والتالى تحت باطها صرتها وعلى خير يافلانة قالت ماشية للحمام
ما فيه يوم شدت مكنسة ولا يوم قلت حتى دحية هذا عمل حتى اللا البية ما داراته
يا بختها مش زي حالاتى نحط القدر على البابور ونسخن المية ونغسل فى الليان وهي الحمام عليها خطوة
هذى مش تبى طريحة هذى تبى فلقة مليحة بعصاة الرشتة
توزنى كلامك ياعويشة شنو طريحة وفلقة مليحه شنى هي حمارة والا حلُّوفة
هذا تطييح قدر وقلة احترام ماقال بيه ربى ولا قال بيه اسلام بنادم يجيبوه الاحسان يا عويشة
خرفى يا حنة هي وخدة عقلة ويحلف براسها وما يحنت ولا يتنى
غير قولوا لى شن زاد فيها ربى ماهو زيها زي النسوان وفيه ستين واحدة احلى منها
أنى سمعت امالى راجلها امشوا بيردوها
تو بوها يردها بالطيبة والا بتشكيخة وكان عانداته يروكها طريحه
تحساب بوها هوين وتحسابه يرضى بالبطال والفضيحة
والله إذا كان حمَّر عويناته وعنقر الطاقية جاك القضاء يا مرومة
اخيه على رُجله تعقبها ذلة وامرا بعد الحرج تولى زي الكلبه
بالله قيلونا من سيرتها ربى يهديها ويهنيها واللى يربطها بايديه يحلها بسنونه
وسمعتوا قالوا فلانة نحت الفراشية ولبست البيشة والكبوط وامها وحناها مدايرين عزى
مش غير هية حتى زكية دارت زيها شورها تمارى فيها
ما هى يا حنة بتخش الجامعة وتبى تولى طبيبة والا مهندسة كيفها كيف الرجال
حتى خديج واختها نفيسة مشو لبراقونى وصورهم
العفو ما لقوش غير هالطليانى ماهو قدح فى جنبه على الاخرة نفعوا طرابلسى
خيركم نسيتوا الرجالة كيف نحوا الحولى والسورية والسروال العربى
ولبسوا البوطويل والطربوش والكلباك
هذا شي مش جديد علينا وما هو هكى يلبسوا الاتراك
والناس الاولى تقول كل جيل وجيلة وكل بلاد وعزاها
خيركم يا نساوين شوركم هبلتو الراجل ما دار شي يعوره
والمرا نحت الفراشية اللى ساترتها وولت ليشُّو كل ما فيها يبان
وشن الفرق بين البيشة وتبمبيكة الفراشية يا عويشة
لا ياوخيتى البيشة كانت جت ريح قوية اطير ويبان وجهها للى ماشى واللى جاي
انشا الله ربى ما يكشفنا حال وشورة الدنيا بتوفا ربى يحسن الخاتمة
انا يعجبنى الراجل اللى لابس الكاط وطاقيت البسكل وقنيدرته تلمع تقول مرايا
تماهو جابو عليه غناية يالابس الكات الكمونى منك ما نواطيش عيونى
أنى يزهى فى عينى الراجل اللى لابس الفرملة والزبون والبدعية والجبة على الكتف ومعنقر الطاقية
امبارح جونى مستادنات فاطمة جارتنا بدِّير اسبوع ولدها بالزمزامات وقالو يبو يديروا حضره
انى مشيتلها وباركتلها على خلاصها ولقيتها قريب تطير من الفرحة ما هى راته على شوق
راجلها صبر عليها سنين لا تزوج عليها ولا طلقها
هكى ولاد البيتية يديروا والا بيعاند قدرة العزيز المولى
شنى ومن يعرف لو كان هو عقيم والا هيي عقيمة
يا عويشة شدى لسانك وانت فى كل ميعاد تلقحى
المرى فرحانة وكل صبح تبعث لجيرانه عصيدة بالعسل والسمن الحقانى
والله صدق اللى قال الايام عند الصابرين يولوا والاقفال بعد تسكروا ينحلوا
البارح راجلى قالى عمك الحاج جمع أهل الحومة وقال لهم يبى يعاود يرشح لمجلس النواب
ان شا الله ربى ينجحه هالمرة وهالحكومة الغبرة ما تزور الانتخابات
والله ما يلقوا الناس خير منه راجل حقانى ومتسمى قلبه عالبلاد ويعرف يقرا ويكتب
وخيرك يا حليمة ساكتة وحزينة تقولش كان مكسر على راسك القلال
أنا يا وخيتى واجعنى هالشيبانى اللى مات يعطيك عمره
خرفى يا حليمة مات النبى واصحابه وبعدين هذا راجل ولَّف وكمَّل عمره
ووه عليك يا عويشة لايسلم منك حي ولا اللى فى قبرة
هذا راجل فقيه وعالم وراجل فاضل وخيره على الجيران كثير مش شوية
شن نسيتى كيف كان يوزع كباش العيد على الفقير والزوالى ويفرَّح الصغار بالعيدية
وين اللى ما خدى بيدَّه وين المريض اللى مازاره وفى كل عزى تلقيه هو الاول وكيف ما يجعوك يا وخية
مسكين الراجل فى قبرة وربى يرحمه ويحط عضيماته فى الجنة
وقالوا جاته جنازة كبيرة حضروها اولاد المدينة وجوه ناس من تاجورا وسوق الجمعة
هذا راجل متسمى وعليه القيمة
تهيا يا عويشة صبى الشاهي وانت مخلياتة على الكانون يركرك
هيا سقدى يا عويشة المغرب قرب يدِّن ونبى اندير لقمة قبل ما يجى زول أمه يتنطفر ويهبك
اعطينى حبيبات كاكاوية نمضغهم وما نوصل حوشى انين كليت آخر حبة
شن يا فطيم وليتى هبودية تاكلى وتمضغى فى الشارع
ومن يعرف شن ناكل وشن نمضغ وانى متبمبكة بالفراشية والرجالة لايرفعوا عين ولا يقيدوا فى احوال
هكى كان حكى النسوان يجيبوها من طقطق إلى السلام عليكم تقولش كان نشرة الأخبار
وكان غابت الحاجة صالحة تحضر القرمة عليها بالطة وساطور
واللى حطوها عليها يا ويلها وما يحلى ميعاد ولا هدرزة الا بيها
هذا حكى النسوان التموا فى بيت الجيران وبيه نختم الحلقة الثانية من مسلسل طرابلس يا طايحة السعد والمزّال
والحلقة الثالثة نجكىيلكم على عرس نفيسة
وفيه عجائب وغرائب وعادات ما نعرفوا مصدرها
لا يعرفوها بنات توة ولاشباب اليوم
سبعة أيام وكل يوم وليلة قصة مختلفة وقليل من يعرف كيف كان عرس زمان
أيام سعيدة تفرح القلب غابت بعد ما خشوها الشلفط وهذا اللى خلانى نقول طرابلس يا طايحة السعد والمزّال
وحتى نلاقيكم يوم الخميس الجاي يوم تطلع فيه مستادنات عرس نفيسة نحييكم ونمسيكم ونقول السلام عليكم
مختار الطاهر الغول
طرابلس-ليبيا
2012/6/1