خالد حيدر:نحتاج الي قرار سيادي لتأمين بنغازي !

الله ياأخ حيدر اشكيلي نبكيلك = راهو مش بنغازي بس تحتاج الى قرار سيادي - لكن الامور في جميع انحاء ليبيتنا الحبيبة ملخبطة - والحالة سيئة - انتم على الاقل قاعدين في منازلكم وفي اعمالكم وصغاركم في مدارسهم انا اعرف ناس كثيرين داخل ليبيا وانا نقصد على الليبين المهجرين داخل بلادهم = وكأنهم مش داخل بلادهم - الناس النازحة من مدنها لاسباب عديدة - مش تاورغاء راهو بس =- فيه عائلات كثيرة تركت بيوتها عنوة وغصبا على ارادتها - لو نحكيلك من توه للصبح معاش نكمل - مساكين ناس تركت بيوتها ولم يعد في مقدورها الرجوع اليها - لانه تم الاستيلاء عليها من طرف خوتهم الليبيين - تركوا مزارعهم وبيوتهم وتم الاستيلاء ممتلكاتهم بغير وجه حق -

المهم ليبيا تتطلب ناس تخاف ربي وتحط الليبين في عيونها وتسهر على راحتهم وتردلهم الامن والامان والاستقرار وراحة البال - والله حتى الصيام مش حاسين به = لعدة اسباب واكيد تعرفوها=

فلا تزعل ياخ حيدر ولا تتنكد - انشاء ربي يجيب الفرج =

كل واحد واخد قرعتا يا داير يا لاقي
لكن الضلم حرام ناس واجدة ما عندهاش دنب

مش عارفة شن صار في الناس المهجرة من اجدابيا - تقريبا قاعدين في بنغازي - وحتى ناس من الكفرة = قاعدين في المنطقة الشرقية = وفيه ناس من بنغازي = شوفتها في طرابلس - لان بوهم زمان مدير مدرسة وكاين ضبط وربط = وصارتله مشاكل في بنغازي - لان كان يمشي في المدرسة بضمير وخصوصا في الامتحانات - ولذلك لما تلخبطت الامور = تعرض لمضايقات = زي تصفيات افراد الامن الداخلي في بنغازي = توا هديم مش حرام شن ذنبهم في النهاية شغلهم -= وبعدين المفروض كان هذه نيتهم من اول ليس ما وضحوا صورتهم في بداية الثورة وقالولهم ما نبوكمش - على الاقل طلعوا من بنغازي لمكان اخر -

الحصيلة حتى انكان داير = فيه قانون وفيه دولة انشاء تقوم والا جعنها ما قامت - وكل واحد ياخذ حقها - مش كل واحد ماشي يجري بسلاحه = يحلم في الليل وينوض يطبق في النهار0احنا ماناش في غابة

انشاء الله ربي ياخذ الحق في كل شخص زهق روح خوه المسلم بدون وجه الحق -

حتى شرطة المرور ما سلمتش منهم - واحد حرر لواحد مخالفة لانه طلع في الضي الاحمر توه تفكرها وشدهلها اعتقلوه ولعند اليوم عينك مرت عمي - حتى هذا يا داير يا لاقي - معقوله = لو احنا قعدنا على الطريقة هذه معناها القانون اتشاو عليه -

يا داير يا لاقي للجميع و ليس لفئة معينة للجمممممممميع
الي دايرحاجة في اليبيين يلاقاها اليوم والا بكرة هدا قصدي

لا ياخوي ابراهيم بدا العاطل عالباطل
وبدوا فيها علي اوله اللي داير واللي موش داير ..
اللي عندهم توا ايريدوا ايصفوا الشرطه والاجهزه الامنيه المتخصصه
فيهم وعارفه تحركاتهم وتعرف كيف ترصدهم ..
وانشأوا لك جهازين ..الاول اسماه الامن الوقائي والمفروض ايسموه
الامن الاجرامي بدية من رئيسه اللي يدعى ابراهيم البرغثي لغاية
اصغر وااحد فيه ..
والثاني اسماه اللجنه الامنيه العليا وحتى هم نفس النهج ونفس
الخط والجهازين هذين يقتلوا القتيل ويمشوا في جنازته وهم اللي ايهيأوا فالظروف لاذنابهم عشاااان اينفذوا تفجيراتهم واغتيالاتهم
عشااااااااااان يفضى لهم الجو ..وفي ناااااااااس اخرى فالمجلس وأخرين غير منظورين لنا ايحاربوا في بناء الجيش عشاااان ايتحكموا فالبلاد والعباد..
وعلي فكره اللي ماسك الامن الوقائي المدعو ابراهيم البرغثي
هو من ضمن المتهمين في اغتيال المرحوم الشهيد عبدالفتاح يونس
~~~~~~~~
القرار السيادي تاخذوه انتوا يارجااااااااااال وضباط الشرطه
لأن المجلس متواطئ مع هذه الفئه والدليل اللي متهمين في اغتيال
اللواء الشهيد ماسكين مناصب ومنهم اللي قاعد حرس خاص للمستشار رئيس المجلس ..
شكـــــــــ ـــــــــــــرآ وبــــــــــارك الله فيــــــــــك

اخي اسماعيل قصدي واضح كل من دار حاجة فينا قبل الثورة و الا بعدها
اما الدولة لن تقوم الا على ناس متخصصة في الامن و في الدفاع يجب على الليبيين ان ينتبهوا لهدا جيدا ام المسميات الجديدة امن وقائي امن وطني الجنة الامنية العليا هم مسميات لكن التطبيق يحتاج الى ناس متحصصة في هدا المجال و الا لن تكون هناك دولة و لن يساد القانون ولن تكون هناك حكومة و خلاص هانت و نتريحو من هالفوضى ان شاء الله
حفظ الله ليبيا و اليبيين و بارك الله فيك اخي اسماعيل

تو بالنسبة لي انا ماني مسامحة حد - سوا قبل الثورة - او بعد الثورة - بديها بمصطفى عبد الجليل لعند الكيب ولعند غيره وغيره - يصرفوا في فلوس الليبيين على الماشي والجاي واحني نتفرجوا -

ومافيش حد مدور منهم الشعب الغلبان على الرغم ان الثورة داروها الغلابة اما المسئولين الموجودين الان في الوزارات جو من البحر ولا من الجو -

اني والله نمشي لطرابلس ونشوف في القهرة بعيوني - هالوزارات هذي يكلمك الواحد من راس خشمه - جو الامانات متاع زمان - الحقيقة داروا قبل وتوا قاعدين يديروا وانا ما نيش مسامحة حد يقصر في حق الليبيين سواء قبل ولا توا



ونفس التجاوزات في النظام البائد نفسها وفيه ناس عندها مصلحة في عدم قيام الدولة والمؤسسات الامنية - انا انقاش في امر واقع لانني اتردد على الوزارات ونشوف الناس الغلبانة كيف تراجع على اوراقها - ومقهورة من داخلي ومش قادرة نديرلهم شيء يقولوا للناس في البوابة فلان مهناكش ونسال عامل المقهي يقولي قاعد - جو زمان -

وعلى فكرة راهي بلاش نحلموا احلام وردية ونقولوا جابولنا شعب جديد احنا رانا نتعامل مع نفس الشعب مع خلطة من المستوردين الجدد طبعا هالناس الجاية من برا هازيين علينا وحاسبينا متخلفين ومانفهموش حتى وزيرة الصحة في لقاء معاها قالت سبب تزايد موت حديثي الولادة يرجع الى ان ثقافة الليبيات تفتقر للنظافة لانهم يتفرجن على الاذاعة المرئية ومش مركزات على النظافة - والله حالة

عموما شكري يتجدد للاخ اسماعيل ادريس

هذه مور لازم منها قى ضل غياب الامن والامان...ربى يستر الحال