بعد الحادث بلحظات وصلت سيارة شرطة المرور ...شعر

من طرف **جمال المروج** 2012-10-27, 11:39 pm

بعد الحادث بلحظات وصلت سيارة شرطة المرور ...

**شرطي المرور**

شن دارلك هالبالو لطيته *** قدامك قطع ولا بروحك جيته
البارح اكيد شبحته شامخ**** مثيل الصقر ماد اجنحته
مصبي مع خوته قباله تحته***القطران ضاوي ضاوية حاشيته
شن دارك ياحاج ليش نطحته***شكران ولا ثار حار خديته

**الحاج**
مـــــــــاهـــــــــــــو مني** ماشي بكرهبتي ونا متهني
فاتح الغرباوي حداي ايغني***ماسك ايساري واليمين عـطيته
ما نندري عاللي وراي طعني ***رماني على هالبالو قـليته
لا اسكرت لاني جايه متعني*** تحرم عليا حجتي ما ريته

**شرطي المرور**
ياهوه جاي تعالى *****عطيني اوراقك كل شئ قباله
شن جيبك للحاج تخبطهاله ***لين انعزق عالبالو خليته
انت اللي غلطان حسب اقواله***بسيارتك من لاورا قبيته

**السائق الشاب**
كف ملامي **** ماني اللي غلطان غير اقسامي
سي الحاج شد افرينوا قدامي***ونا دوبني بالطارقة حفيته
تلكمس تلفتلي مشي متعامي***طلع م الطريق وصار هاللي ريته

**شرطي المرور**
بلاش كثرت دوة *** هات الاوراق امشي ورايا توه
انتموا المحضر ننتهوا من سوه** بالمحكمة يضمن الحاج قضيته
ولا ايفرحك لو كان سامح هوه *** مازال حق البالو ما نسيته
ما زلت ماني ناسي مازال حق البالو في راسي
انخليك تمشي في الطريق عفاسي** تبيع رابشك واتردله عافيته
خير دعوتك منك كثر هلواسي ** تبي بالكراهب تلعب السبيته

**السائق الشاب**
انعول علي بيعتها*** سيارتي ماعادنبي كسبتها
والحاج ياخد حق تصليحتها ***والبالو نعطي الدولة ديته
غير زومتك نفتك من شوفتها***ياللي الشماته طبع فيك لقيته

**شرطي المرور**
فمك خيطه *** اوزن كلامك زين خود الحيطه
ولا انوض اندزلك عالقيطه** ايقلك قدا الشعبة تحصل بيته
(الشعبة= الامن)
ستة شهور ان كان جت بسيطة ** اهانة موظف وقت ماموريته

**الشاب**
ما قوى عينك ** تبي نتبكش وانت تدوي بينك
لو كان مانك هنتني ما انهينك *** انت اللي باب العوج حليته
القانون داير حد بيني وبينك*** ورقة وقلم لا سب لا سبيته

**المرور**
بنقول هاللي ودي** **وانت كلامي تسمعه وتعدي
ما دمت ماسك رقبتك في يدي*** بعانة الله تقصر على التنهيته
وكانك ابتشكي وين تبي اتعدي *** يردك الحيط اللي متين بنيته

**الشاب**
لايردني لا انرده ولاني من اللي يدل وقت الشده
توه انعجنك كيف ماتقول مخده ووجهك الشين انزيد في اشيونيته
ان جتني في حبسة عام جيش انعده وانحيد غل ايضرني ان كميته

**المرور**
هابا هابا بل ايدين خالقني الله تحسابه
تره قيس روحك ديرها يا بابا** المسني بصبعك كان ما قصيته
في الضرب حتى تايسون ما انهابه **اللي شين وجهه كيف وجه اتشيته
انشد علي خالك شباب جرابه** قداش وجه امهشمه بتنيته
من اللي اعراض مناكبه واشنابه** مش فرخ كيفك ناقصة تربيته

**النتيجة**
بدت حكاية البوني ربخ والموس واخد بايده

الشرطي ثلاث اشهور في العناية***كان ما الله ايرد له عافيته
كان من السواق دار جناية **** مشكوك يرجع بعدها لبيته

أرجو أن تنال رضاكم ...منقول