هده ليبيا قولو لمن يجهلها للشاعر عبد الوهاب العرفي

القصيدة كاملة

هذي ليبيا

قولو لمن يجهلها ... فراسين هلها .... كمين ضيقة فاكين وحلها

فيها ارجال ... وشعب صامد للعنا شيال

وناسه ابوادي اجواد موش انذال ... تلغب اللي حاسد ويستاهلها

م الجود والكرم حتى ان ضاق الحال .... بالضيف يفرحواويفرح اللي ينزلها

فيها البيضاء اتبان فوق اجبال ... على اسمها بيضا الله جعلها

وفيها مدينة امشهرة بارمال ... مصراتة انسام وخير يا مجملها

وبنغازي اللي ما تنتسى محال ... رباية الذايح بالخير مشهودلها

ولبردي افطبرق كيف راس اهلال ... اتعجب وتشرح نفس من يوصلها

والمرج الطبيعة امخضبة باشكال ... ونسيم الجبل بالود متخللها

ودرنة الزينة امزينة بشلال .. اطيب سهاري من ناسا تنهلها

والزاوية العظيمة مهد للابطال ... تحية لها مالمرج نا نرسلها

واجدابيا الصمود افعال موش اقوال ... كسابة اللي متسمية باشملها

وعروس البحر هاللي عليها طال ... ظلام الليالي نين قبل قتلها

اليوم زاهية بنجمة مع لهلال ... طرابلس اللي نزعل عليه زعلها

والغرب الجبل يفرحبنا مازال ... امازيغ وعرب عشرة افقير عسلها

وزوارة العزيزة اللي عليها انهال ... الدمع نين م الطاغي الله نشلها ....


والزنتان ... تاريخ فالجهاد وكيفا فزان

ومن نالوت شرق لا جبل غريان ... كيف اسبوعا والعرين جبلها

وكلكة واتكوت القلعة والرجبان ... مالصدق ناس اللي اتقولها تفعلها

وسبها وجالو واوجلة ودان ... امزين صحاريها اشموخ نخلها

وغدامس اللي جنة ورا كثبان ... اتعجب وتذهل نفس متجولها

ويا سادة الكفرة افكل وقت او وان ... اتجي فازعة ما البعد يوم عزلها

علي ليبيا ولاهي اللي تنهان ... اجرع الفاشي امرار وين نزلها

وفيها ازليتن منارة للقران ... علي طول الزمان ما الطاغية بدلها


والخمس وصبراتة مع صرمان ... لا تخذل الوطن ولا الوطن خذلها

وتاجورا ضناها كلهم فرسان ... لا فزعوا الفزعة ايجو فاولها...