لا لــــــــــي وريــــد

لا لــــــــــي وريــــد
لا لي وريد ينبض بنبض وريدهم
ولامن قربهم ولا انريد نسمع بذانهم
ولاني الخالق نين نقدر انعيدهم
ولاني حسيب لهم على عصيانهم
ولالي شماتة عين فلي تصيبهم
ولاني حسود ان كان صح زمانهم
ويوم البعث لا انظرهم لا انفيدهم
ايجوا بكبرهم والا يجو بأيمانهم
في دنيتي في الارض ماني حديدهم...
ولا جوايدي جبدن على غيظانهم
ولا يامر سريتي يوم يقدر قليدهم
ولاني رميه في مدافي احضانهم
ولاهم اسياد لي ولاني سيدهم
ولاني رعية ولا لهم سلطانهم
ولا انريد منهم شي ولاني طريدهم
وامطالب رهن الدين في ديوانهم
ولامن قديمهم نلبش ولامن جديدهم
ولاني رهينه تحت ختمت ضمانهم
ولاني امزمت من ليقط حصيدهم
ولاني اللي طاحن على مطحانهم
والرزق في ايد الله ماهو في ايدهم
ولا ماعلي طيبة اثمار غصانهم
ولا نضايدي نضدن بحيط نضيدهم
ولاهن ارمام البيت من كتانهم
ولاانريد يوم الشيل نشهد غديدهم
ولا انريد يوم الميز نركب حصانهم
وانكان هم عطوني قدر قدر انزيدهم
وانكان احسنوبي انزيد فوق احسانهم
وان جو مع طريق السلم ناهو عضيدهم
وان جو بالعوج نعرف جميع اركانهم
وانكان هم ايريدوني مازلت انريدهم
وان كان ماايريدوا القرب مني شانهم

تسلم اخى عبدالحفيظ

اسلمت خوي عبدالحفيظ