الشاعر سعد العمرونى

الشاعر سعد العمرونى
مامن مؤمن يعزي أخاه بمصيبة الا كساه الله عز وجل من حُلل الجنة(((قصيدة))
موت الاب؛:مٌلك حادث. موت الزوج :زواج جديد. موت الاخ:كسر بالجناح::موت الابن
صدع بالفؤاد(((ولا اصدق من حنين الام على ابنها)) وفي ذلك قصيدة
العين بالنظر توزن الكون سماحة
والوذن تسمع والقلوب خزينة
سبحانه بحمده ف المسا وصباحه
اللي نعمته تمم وكمّل دينه
وزيَّن سمانا لوله مصباحه
وامسيّر علي موج البحور سفينة
وخالق بشر عالم بسر ارواحه
نفخ ف الجسد وينما نشا تكوينه
وناشي سحاب تسوق فيه أرياحه
وكيف ما حياها لرض هو يحيّيّنا
وسالن اللي كانن اجداب نشاحه
وبانن اللي كانن حبوب غبيِّنة
وفراحه اللي رعيان والفلَّاحه
وتمَّه ربيع عجيب في تلوينه
ولعبن طيوره ونسمته فوَّاحه
او وان الضحا تسمع عليه زنينه
نحل ع الزَّهر يرتع وجا لجباحه
كلا الطيَّبة وطيِّب عطى شافينه
وتشبع ادَّر حليب لك صيَّاحة
بين فرثها والدم حلو يجينا
وأيام الربيع بصيفها تزَّاحه
وانصفرت اللي كانت خضار وزينة
ويبان الشراب سراب في ضحضاحه
تحويلة نقاطي شين ينطق سينه
هن هكذي ليام رمل وواحة
هذي امعطَّشه هذي شراب ارويِّنا
العين تنظره وتكون له صفَّاحه
كتاب الهنا والحزن فوق جبينه
تغرَّك تضرَّ تمرَّ دامالاحه
أطفي جمرها تلقى رماد عويَّنه
انريت حلوها واخذ كبير مساحه
عليه حزنها يبني إمرار ألقِينا
و ريت من رقاها وين طال نجاحه
منين ما رقى يحدر عليك اتهِّينه
وكيف ماعسل ياكل معا التفاحة
وين تنفره اشَّها دقيق عجينة
ظغى بمالها وان المسا بفراحه
عليه صبَّحت نزل دموع سخِيِّنة
لا لا نجا م الموت لا له راحة
لبنادم ولا م الخلق يضمن شيْنة
للفاقد وللي مافقد وضَّاحه
أهناك فرق فيه الفقد لك تبيِيّه
يموت بوك تملك ف العقاب ارباحه
أموال ورَّثك والا عقار الطينة
ويموت زوج يأتي زوج في مطراحه
وكيف ما أغلي لول عليه اغلينا
ويمكن ذراعه طار طار جناحه
انكان اخ شال خوه شور دفينه
وتقول كسر في قلبه ومر اصلاحه
لبنادم اللي فاقد صغير جنينه
وغير لأم را تكذب اللي نوَّاحه
وغير لأم ماحنَّت عليك حنينه
وتريد الكلام اللي كلام صراحه
الصبر خير ما كيفه دوا الحزينة
وغير صبر مايلقى دوا لجراحه
اورا الهم مايهوَّن الا تهويِّنه
اوراها المصيبة لذنبنا مسَّاحه
ومصيبة الغير انشوف وتعزيّنا
لايغرّك انت في قصر سمح سطاحه
ولا اطمّنك فوق القبور سكِينة
من يوم اوّله ها لأمر شوف أشباحه
سكرة الموت وغسل والتكفينة
وعليه التراب اي ايطوّحوا طوَّاحه
ويبات في امظلَّم مامعاه قرينه
لامال لا فازع فزع بسلاحه
لبنادم ابما قدَّم يكون رهيِّنة
وان تخلص الدبكة نطحة النطّاحه
في يوم يومه بألف عدّ سنًًينه
استغفر لذنبك كون م السبِّاحه
وارفع ايديك بيا الله نجِّينا
وغضّ البصر واهن اسباب فلاحه
سبايب امراض القلب نظرة عينه
وصلّي عليه وكون من مدّاحه
دوم بالصلاة صلي عليه نبينا
الماحي اللي بيه الضلال تماحه
محمد اللي طيَّب ثرا المدينة
الحاشر علي اقدامه تجي منذاحه
يوم حشرها وياالله شفّع فينا

تسلم اخى عبدالحفيظ