خلاصة الراى اوحلت ..::لشاعر القدير فاروق سالم طبيقة::..

من طرف ورفلة تعلت 2011-01-03, 2:03 pm

السلامـ عليكمـ

خلاصة الراى اوحلت ..::لشاعر القدير فاروق سالم طبيقة::.. 993502

ـ و اخواتيـ اهاليـ هذا الصرح الراقى

اليومـ اقدمـ لكمـ قصيدة منـ اروعـ قصائد

الشاعر القدير

فاروقـ سالمـ زناد اطبيقة

اتقولـ القصيدة

خلاصة الراي اوحلت . عزيز ما نسيته لا قسامه طلت .انموج بينهن خلاصة الراي اوحلت

خلاصة الراي خذينا ... في عقولنا من غيته وعطينا

عزيز لا قسم صوبه وبيه زهينا ... ولاقدرت ننسى سيرته حاولت

ذكراه مازالت معاي دفينه ... حتى ان كاني سقت الرحيل وشلت

ننساه لحظه نذكره في حينه ... نلقاه في وين مابفكري جلت

نلقاه حلم في ساعة النوم ايجينا ... ونلقاه علم عنه مانهار غفلت

نلقاه حزن ساكن دنيتي الحزينه ... نلقاه فرح بيه زهيت وادللت

نلقاه في دفاتر يحملن ماضينا ... ونلقاه في حاضر عليه اقبلت

نلقاه شي في كل شي لايد بينا ... ملاك مالك املاكي وما نولت

انواطي عليه العين نلقا عينه ... هيه نفسها عيني اللي نزلت

********

خلاصة الراي كسرني ... وبريت عالعياب حداه ماجبرني

وساقهن مراحيله وماخبرني ... من تحت حس ومس لين اذهلت

بيه وين ماصاحب الصوب هجرني ... بلا رادتي عنه عزيز اعزلت

وحتى ان كان هو بدير الخطا بادرني ... ونا بالخطا والعيب مابادلت

عندي فيه منشد شوق ماحيرني ... غابي عليما فيه ماحللت

مازلت يابكر الغلا فاكرني ... ولا انسيتني وقصة غلاي قتلت

نلقا عزم عنك وين ويصبرني ... عليه دلني كانك قدرت وصلت

ماتقولي قسم ونصيب جبرني ... وناعارفك عالناقصه عولت

ولاتجيب عذرك لاتقول اعذرني ... ماتشفني بالدمع مهما سلت

خطاك في ليالي غربتي صمرني ... ماخطيتني للشام وين رحلت

نحسابه رهين مكان ومحاصرني ... غلاك يندثر كان الخطا صملت

القيته علي حاكم ومستعمرني ... رفيق عمر كيف ضلي وفيه اوحلت

انموج يابعيد الدار لو تنظرني ... لاصدت قسمك لابلاك احملت

********

عليش انزايد... ونحل باب خاصر ماوراه فوايد

ونحلم بروحي قسم غالي صايد ... اضغاط حلم بيهن خاطري ضللت

صحيح كنت في الماضي زويلك رايد ... أمنينك على عهد الغلاء مازلت

أمنين للغلاء كانن هناك سنايد ... الاخلاص والوفاء مبدأ غلانا قلت

نقشنا على صخرة الصوب شهايد ... بعهود صوب كبلتني ونا كبلت

عانيت من نارك سنين مدايد ... وجريت في غلاك جريت لين بطلت

درتك علم عالي وصيته شايد ... وفيك مارضيت العيب لا جاملت

ووديتك وماخصن عليك ودايد ... وقانيتلك بيدي ماخبلت

والغاليات عديتهن معاك زهايد ... و الصاعبات يصعابن ونى سهلت

والكاربات خليتهن حداك سعايد ... والناقصات ينقاصن ونى كملت

والصايفات مزالن حداك بدايد ... اللى بلمواجع حالهن ذيـبلت

والنزفات درتلهن نصيب ضمايد ... عليهن بفزعة حر ماطولت

والتايهات في ضيهب الياس شرايد ... خطاهن على درب النجا حولت

والنازحات من قهرت سنين نكايد ... لهن دلو من بير الدموع نشلت

والعاريات من كسوة الثوب البايد ... كسيتهن بثوبي سترهن عجلت

بلا ذنب لادرنا معاك مكايد ... حمامة الغلا من عشها جفلت

جمل صوب مازكين عليه شدايد ... بعقال ياسك ركبته عقلت

********

خلاصة الراي اوحلت . عزيز ما نسيته لا قسامه طلت .انموج بينهن خلاصة الراي اوحلت

المصدر أبن عم الشاعر
عبد الحكيم اطبيقة

وقريباً فيديو و تسجيل mp3

تحياتى للجميع