الاجــواد يا وقت وين ..

الاجــواد يا وقت وين .. اللي نجعهم دوم ناير
دوم نارهم كابرين .. ما عمر فكروا ف الخساير
طعامه للي عابرين .. وقدرهم ع الرميس فاير
ع الباس اشداد صابرين .. صناديد تلقاهم عصاير
وع الموت يزابوا واردين .. ولا ذل م الغازي وقهاير
كي السيل يجوه حادرين .. بقرّح وزناد الدقاير
فزاعه للي جايرين .. حمالة أثقال الدباير
لذيذ عيشهم واكلين .. قوتم ما يجي ف الشكاير
بيدهم الارض حارثين .. يستنوا فغيث وبشاير
إن صابا جوه حاصدين .. رجال وصبايا حراير
وشاعر يقذر عالمراهين .. وغناي يفضفض م المراير
للذيلي ماهم تابعين .. مشهور شيخهم بالفخاير
ما يواطوا للضيم راضخين .. ولا ياكلوا حق ساير
اعفاف يباتوا جايعين .. ولا قوتم يرضوا بالصغاير
واليوم من دار الملايين .. عليه الناس تتطاير
إن بوم داروه شاهين .. قناص لخيّار الحباير
يرد فالصاع بإثنين .. فارس وما شد الذخاير
يفزّع ما هو م الفازعين .. الاعذار يديرولا كثاير
وسلطان يبقى م السلاطين .. ويا شيخ ينادوه العشاير
حدّاث يديروه زين .. وهو مانطق بالثماير
الذيول يجوه طايعين .. في جرة اجيوباً عماير
يا وقت متعاكس وشين .. واحوالاً تجيب الغثاير
ع السراق ينقال أمين .. والحق قليل النصاير
الحاصل للعوج ناظرين .. وم العمل صافن عقاير
زقوم ف البطون ماليين .. وبالرّبا رافعين القصاير

بارك الله فيك ع الموضوع الرائع

مشكورات ومروركن مميز

مشكـــــــــــــــــــــــــــور وبارك الله فيك