حديث لجــــــواد ...تبا لكم ان عدتم عدنا ..

من طرف **زهرة اللوتس** 2012-01-26, 9:10 pm

عن:عبد الفتاح الشلوى
حديث لجــــــواد ... شيخ لجــواد فرحان او زاهبتله الدنيا .. الشيخ موش عارف كيف ايسهرى على شباب درنـــة يوم ما قالوا ان الازلام اظهروا من جديد فى بنى وليد .. الراجل شفته واقف فى ميدان الصحابة هذيك الليلة .. المطر اتصب اوهو قاعد ايتفرج عالشباب الليبي عقاب الليل لا همهم مطر او لا ريح او لا جوع .. السيارات اتكب بالتريس فى ميدان الصحابة شباب خيرة لخيار ... معنوياتهم عالية ... اوهو قاعد مبسوط ويقول ( الله .. الله .. يدعولك ساعة هولك ) ( ما يفزعلك حلي من هلك ) الشيخ متأكد منه شفته فالمسيرة المنددة بالطابور الخامس والسادس والسابع .. الراجل يهتف ويقول . ( ان جيتوا جينا نضرب العايب بيدينا ) سألت الشيخ او قتله كنك يا شيخ لجواد ؟؟ ربى ايزيدك عز او هنا ... قالى كنى ما نفرح اوهضول رجالة الوطن .. ايدقوا العايب علي عينا .. قتله ما اسمعتش الشباب اللى عدو من درنة البنى وليد ؟؟؟ !!!!!؟؟؟ قال اسمعت اسمعت ( شباب كازين ايدين على وطنهم ما ايمايلوا .) نعم نقول للمرجفين تبا لكم ان عدتم عدنا ... تحيــــــــة كبيرة لكل شباب الكتائب من مدينة درنة الذين خرجوا تلك الليلة صفا واحدا ويدا واحدة ضد الطغاة المنافقين تحية لهم ولكل رجال الوطن الشرفاء وتحية لهذا الشيخ الذى وزع التمر والحليب على شبابنا فى كل مكان من مدينة درنة وخارجها . الله اكبر الله اكبر الله اكبر .