هيا هيا ... كيف قبل مازالت جماهيرية

هيا هيا ... كيف قبل مازالت جماهيرية ... شلة زمان اقعدت هيا هيا

هي شلة الكولاسة ... هي دولة معمر وهما ناسا
الي بروسهم قالوا انفادو راسه ... الي مجدوه وصفقو جملية
الي كاينين زمان تحت امداسا ... الي مايحقو شي غير ابضيه
... الي ذوقونا علقمة من كاسا ... الي ظلمهم خلا الشعب ضحية
الي بنيهم رزق الحرام اساسه ... الي يصرفو المليار كيف المية
الي بالقاقة وثقولا ساسا ... الي مالهم لااحساس لانغرية
الي كاينين زمان من حراسه ... الي كان جاهم يفرحو بالجية
قلبو الجلدة طمرو النجاسة ... والخضراء اقلبوها براية الحرية
والمركب يريدو يصبحو رياسه ... انضمولنا بين الضحى وعشية
ونسيو ان التاريخ فيه كناسة ... مايطلعو منها اخباث النية
لكن الحرة عندها تراسة ... ايخلو الي لافوق هي لوطية

هيا هيا ... كيف قبل مازالت جماهيرية ... شلة زمان اقعدت هيا هيا

هي شلة السراقة ... هي شلة اللجان والصفاقة
الي ذوقونا مر شين مذاقة ... الي حجهم شور باب لعزيزية
الي قبل كانو يحلبو ف الناقة ... الي هم عمدها خيمته المبنية
الي بالقاقة طولو نقناقه ... الي شاربين الخبث في لميه
وين ما انكشفو واحتموه افراقة ... قالو معمر ضد الانسانية
واليوم فينا لاصقين الصاقه ... يضنو جميع الفايتة منسية
بالشر عمر الخير مايتلاقه ... وهم شر واضح ما نضرنا زيا
النهاق مايسيب الا نهاقة ... وهم ناهقين العمر موش شوية

هيا هيا ... كيف قبل مازالت جماهيرية ... شلة زمان اقعدت هيا هيا

صلاح الغزالي