الروقه يا عقلي الجوال # اوهام خيال # اديار اقدم فاكر مازال

من طرف **العاشق الصغير** 2012-05-11, 5:17 pm

الروقه يا عقلي الجوال # اوهام خيال # اديار اقدم فاكر مازال

الروقه يا عقلي كي صار # اتريد اديار # قديمة ماهي ع المنظار

عرب كانوا ما يرضوا العار # اللي خيّال # الشيخ وعيلهم عوال

الروقه يا عقلي الجوال # اوهام خيال # اديار اقدم فاكر مازال

الروقه يالعقيل الروقه # الا مطلوقه # افكار ونار وغيبه وشوقه

وهي كيدي ماهي امعتوقه # عقد احبال # امعا نيران احموم اسيال

غلا غايب لي ادموم نشوقه # اقطع لامال # هموم ونقارينا انذال

ياسي امخرّب ديما سوقه # لعب اعيال # احسبته تاريتى ختّال

الروقه يا عقلي الجوال # اوهام خيال # اديار اقدم فاكر مازال

الروقه نا نشهد بالله # انّ مسداه # تخبّل ما اتفيده امعاناه

وهابى ع اللي صار الله # الطف بالحال # اللي مو نافع با احتمال

اللي غايب طيفه نلقاه # ايجي نزّال # افعقلي داير فيه مجال

ويقسم ويفرّق هماه # وهو بطّال # نظامه تفكيري عطّال

الروقه يا عقلي الجوال # اوهام خيال # اديار اقدم فاكر مازال

الروقه يا عقلي ها القصّه # دارت عصّه # في ارقبتي ولفكار فسسّا

اديار قديمه هي واللسّه # والبنتال # مشت والغيزه واللي صال

خويله اليوم امتار حبسّا # حتى الرال # امعاّب ويبيعه الدلال

الروقه يا عقلي الجوال # اوهام خيال # اديار اقدم فاكر مازال

الروقه ياعقلي لنجوع # الهن لرجوع # ابهن لا اتفكّر دير اقنوع

الخايل سفّاي المنسوع # ايميح اطوال # اقرونه اصلوله جن لقتال

امّا ذود ايحوشن بالطوع # فحلها سال # رغاوي و ورورتا هيّال

صكل نابى يا نوعا نوع # وجت في الحال # ابها حايش ليله ليّال

غبت داره والله لا ايروع # اجعنّه فال # عفا ترجع يجلى لكلال

الروقه يا عقلي الجوال # اوهام خيال # اديار اقدم فاكر مازال

الروقه راني انريد انروق # عليك احقوق # وفّي ما تبقى ملحوق

ادياره لباس العبروق # دما و خوال # انساهم ما تلقاش مجال

الروقه يا عقلي الجوال # اوهام خيال # اديار اقدم فاكر مازال

الروقه لي نا غير اخلفّا # بنحلفّا # العين على التذريف انكفّا

اميام اللي جازي في الدفّه # قطع امال # انساهم ما تبقى هذمال

اقدم يا عين اكذوبه الرّفه # ماي حلال # ادموعك ع اللي ماتوا اسيال

حفّرها اخدودي امجرفّا # اتقول اخلال # ايهرّد في اوذاني صمّال

خبيرك بنعدوه توفّا # ويا قوّال # اسمع لا تشعر لا تنهال

لو نقدر روحي انكلكفّا # ابواب اقفال # امعا عقلي نحبس منسال

الروقه يا عقلي الجوال # اوهام خيال # اديار اقدم فاكر مازال

الروقه يا عقلي ما اتجيبه # كان زمان و تو زمان

اديار اقدم لاشك وريبه # فعلا كاين ليهم شان

عرب تكسب فيها ام جنيبه # افنص الليل اتحوش افوان

عرب بنداقه ليها هيبه # فارسهم كاسب شعنان

قصير القين ايميح سبيبه # همهام لهيد الجضران

مشاويره والله عجيبه # معلوف ابغيزه و مكنان

وميدير معا الصاحب غيبه # افعل بأصله وجدّا ابرهان

على الباهي وكّد تدريبه # ظيفه ايبات وهو شبعان

الله يرحمهم واللي ابشيبه # يرفق به ويزيده احسان

ويا عقلي متجيب سريبه # مولي الدور غصان غصان

اعيون اللي ميرد ابخيبه # انجلّوله ولغريّم بان

خرمله فوق عقيره ايجيبه # مذبوح ودمّه انثران

شوف خماس حموق وذيبه # رتعه اكسبوها الفرسان

امعا فارسها تلقى الطيبه # امعا غيره اتشبّي وحرّان

ابود وسيّاله وتحجيبه # عن عين اللي ايجي ومعيان

طويلة بوع وجنس اعريبه # اقيون الها فيهن اقصران

وسيعة فيها انهاج غريبه # تنّور اعزيز مليان

مصابي تحلف كي النحيبه # جزت في دفّات ووديان

كفل عاتي خايل تركيبه # معا الرقبه تلقى ارققان

خلى اوصافك ياليهن هيبه # بدعه من ربي سبحان

اغيابك واخرى اوهام مصيبه # اتقول اجبال # اهموم عللى اكتوفي تنشال

الروقه يا عقلي الجوال # اوهام خيال # اديار اقدم فاكر مازال

الروقه يا عقلي الجوال # اوهام خيال # اديار اقدم فاكر مازال 944316

من طرف فرج احميد 2012-10-28, 12:15 pm

قصيدة رائعة تسلم اخى العاشق

الروقه يا عقلي الجوال # اوهام خيال # اديار اقدم فاكر مازال

الروقه يا عقلي الجوال # اوهام خيال # اديار اقدم فاكر مازال

رد: الروقه يا عقلي الجوال # اوهام خيال # اديار اقدم فاكر مازال