شتاوي على الكبد

من طرف **عبدالحفيظ عوض ربيع** 2013-08-09, 7:20 pm

شتاوي على الكبد

من مدة كبدي منفرعة **** عدا كل عزيز بقرعة

كل عزيز خذا ماسدا **** من كبدي ياعين وعدا

كملتي يا كبدي تقسيم **** إمغير الحيل خذاه قديم

كبدي مرهون إمقسمها **** ولي بين أيديه ظلمها

كبدي ذابت يا غيابي **** ماعد جيتوا شور إحسابي

كملتي ياكبدي تنهيش **** لي مو واخذ قال إمنيش

كبدي ياالغوالي ذابت **** منكم والقسمية غابت

كملتي ياكبدي تشريك **** لي ماجاتك تو أتجيك

كملتي ياكبدي تشريح **** علي كانون إمقابل ريح

قاسي يا مرهون عليها **** بين إيديك تقلب فيها

أيقلب في كبدي تقليب **** قديم وحظي فيه عطيب

كانون المرهون تقاوة **** والكبد تقول علي طاوة

قولو عالكبد الله دايم **** راحت بين ايدين قسايم

هك وهك قديم قلبها **** كبدي عالنار وسيبها

كبدي ماطيبها والي **** قسمت بين أيدين غوالي

إرطبهن يامرهون أيديك **** كمل جوفي منك تشريك

أتشرك ياغالي وأتزيد **** بعد الكبيدة ويش أتريد

علي كبدي من غير خصيم **** خذيت الغاية يالقديم

لي هاذا ينتش بيديه **** الكبد إتقول إتعز عليه

عليها داشع يالقديم **** الكبد ومسع جاك خصيم

ياناتش كبدي خليها **** فيه عرب قرعتهم فيها

كملتي ياكبدي تشريك **** لي له قرعة تو أيجيك

كبدي يالولاف أخذوها **** وين أتحطوها حطوها

حزت يا عين السهرايا **** كبد وشالوها الغنايا

لي ماعندا شي واشون **** أيزكي كبدة عالمرهون

عليكم يالولاف أشوي **** خذيتوا كبدي ولي لي

قسمتوها قسمة وراث **** أتقول إلا جرة محراث

وين عليه اكبيدة درنا"""رد عزيز كسر خاطرنــــا

كل عزيز خذا ماسدا **** من كبدي ياعين وعدا

كبدي ع النيران شووها .. قدامي ذابت خلوها

نيران عزيز اللي جوها .. تكل في كبدي خلوها
كبدي ذابت لا تلمسا ..... فاهق شين عليها قسا
الكبد انقسمت بين اقند ... مراهين وفاضي واجدد
خلاص خطانى يا القديم....ذابت كبدى تميت عديم
لوكان عزيز اتقولوله .... كبدي من ناره ميكولة
اتذوب الكبد وتبقى دم.....وما ننسى طاري لقدم