يا طرابلس قوليله :: يبل الحكم و يخلله تخليله ،، و يشرب علي الريق

يا طرابلس قوليله :: يبل الحكم و يخلله تخليله ،، و يشرب علي الريق يا طرابلس قوليله ..
قوليله كيف ::
نرضى بحكم جا بالتخويف ،، مازلت عاقل ما نقبل التخريف ،،
و كنه مجنون العقل تو نشريله ..
قوليله باقى البرلمان ::
في طبرق بلاد الامن و الامان ،، لا يزحزح بادى و لا صوان ،،
و لا قاضى جبان ما فيده حيله ..
قوليله انتخبنا و تم ::
بشرعية صندوق بالحبر انختم ،، منك الكرسى راح جاك الهم ،،
طار الحمام و يا وز غنيله ..
قوليله وين العدالة ::
و لا راحت مع هذك الغزالة ،، واعر الظلم و واعرات احماله ،،
ندعى الله ينزل عليكم ويله ..
قوليله النزاهة وين ::
و انتو تحت السلاح اليوم مجتمعين ،، ترد الشرعيه كيف لحنين ،،
ماهو قضاء تما لعيب عويله ..
قوليله اس ::
قرارك اليوم ما دار غير حسس ،، و ممكن تقسم ليبيا بالنص ،،
و تنهار دولتنا بين يوم و ليله ..
قولى لسفيه و خوه ::
تصفق فرحان ليش يا معتوه ،، باطل قرار المحكمة و مشبوه ،،
جا بعد طولو التعطيله ..
قوليله بعلو الصوت ::
غدرك علينا مستحيل يفوت ،، خشيت للجبل فرقت بين الخوت ،،
و هم جيران من سنين طويله ..
قوليله ما فيا امان ::
و رد شعبى يخاف كيف زمان ،، حتى النفس محسوب بالحسبان ،،
لا تركعى تحته و تنذليله ..
قوليله و ثورى كما البركان ::
راهو الوطن منك يا عاصمه زعلان ،، عارفين فيك رجال ما ينهان ،،
و لا تصفقى للظلم لا ما أطبليله ..
يا طرابلس قوليله :: يبل الحكم و يخلله تخليله ،، و يشرب علي الريق يا طرابلس قوليله ..