قصيدة الشيخ // للشاعرسعيد سعد الرفادي

الشيخ هو اللي شايخ علي سياته ....... ولا يقرضا واحد بطول حياته
ايشوخ عيب السانه ................... ولا يقرضا واحد بطول زمانه
ولا يعيب ولا يفلت علي جيرانه ........ويحافظ علي العيله بكل ثباته
الشيخ هو اللي شايخ علي سياته
الشيخ هو اللي شايخ بفعل الزينة ........ وعلي طول عمره ما ايدير الشينه
ومعا كافة الصاحيب تضحك عينه .... ولا يحب للمسلم اتسير شماته
ومعا كل حد عنده عطا وحنانه......... نظيف البدن دافن غبا سياته
بعيد السوايا ما طويل ألسانه ............لا يقول عيب ولا يحب فلاته
انعل السوال كلام بالميزانه .............. موش ملي محقن بلا شياته
هضاك هو الشيخ اللي هذين اوصافه .... وتبكي عليه الناس يوم ام ماته
الشيخ هو اللي شايخ علي سياته
الشيخ هو اللي ثابت علي مطراحه ............ولا تعجبه روحه علي لخرين
كي تجيه يحكيلك بكل صراحة ........... وعارف معا ربه فروض الدين
انصارن مشاكل له كلام نصوحه .......... ولا يقول كلمة شر بين اثنين
ايخلي القضايا كلها مطراحه ............... موش ملي للناس له وجهين
لا عمرها تعفن اللي مشلوحه ........... وبصدق النوايا هو سلاك الدين
ان عاب صاحبك لازم ايندم روحه ....... وكان انتصح ومعاك خلك زين
وابنا البيت ما يرضي اللي مفضوحة .... وينهنه افكار علي العقل الشين
ولا فيه من يخلب الماء في لوحه ...........ولا فيه من يعرف اماته وين
ولا كل من غرا بغزوة اتجي مربوحة ..... ولا كل من ضرب ضربه تجي حمدين
هضا قول له حكمه وباب نصوحه .......... وراه م الصدا حتي الحديد ايلين
والزين هو اللي يعرف نواقص روحه .......ونسه علي فعل الخبيث نهاتة
الشيخ هو اللي شايخ علي سياته
الشيخ هو اللي شايخ بزين اعماله ..............ومع كل واحد طيبات افعاله
وعارف الموت كل يوم تساله ........... وديما علي الجملة بخير وصاته
ولا يكون طاغي كان واجد ماله ........ ايخاف من الله حارص علي مرضاته
وعارف الدنيا كل يوم بحالة ...............كمين كافر بعد الفجور طواته
ليام بين الناس دالة بداله ................... وكل غصن ما يطلع الا بنواته
والراجل الزين ايكون واسع باله ........وعند الشدايد ما تشين الغاته
الناس السعادي هم اللي حماله ........... ايوارو العيب ويستروا عوراته
كان جيت قاصدهم صخا وجماله .......ابموجودهم ما يبخلوا ابعطاته
شريف اصلهم ماهم اللي كرداله ........ ولا يشكروا الظالم بطول عصاته
خايفين م الرحمن جل جلاله ............. شافقين من يوماً ايطول ضحاته
هضا الحق الواجب عليالرجالة ............. اللي ما بناهم علي الخيا ساساته
وعدوك انباشر لا تصدق فاله ............ والجرح الردي يبرا علي شيناته
ديما بسوه كاربات احباله ..................حتي لو صفي مرة اتجي نبهاته
واللي تكرهه ومالك عليه دلالة ............ زرع المحبه في القلوب نباته
واللي حابك وعندك معاه وسيله ................ عقدة قوية ما لها نفلاته
اترايف عليه وبلخطا تمشيله .............. وان ساولك ما تنشد علي زلاته
قوة اصالة في قلوب تليلة ...............روح العلا ما عمرها خشاته
كيف الجبل صامت معا تدويله ......... وان جاه العدو تصعب عليه رقاته
هضا طبعهم لجواد في تفصيله ......... ويمشي معا الانسان كول حياته
ولا ينعدل مشيول فوق خويله ............ لازم اتبرطع وين ما حساته
واللي م العرب يكبر ايفوته جيله ......... يبقي كما الغريب بحكاياته
الشيخ هو اللي شايخ علي سياته
والدنيا علي مر الزمان طويلة .......... والتاريخ ما ينسي علي ماضياته
واللي فوق وزنك ما اطيق اتشيله ...... ولا من تمني شي طال امناته
وبوعقل ما يرضي افعال رزيله .......... حتي لو اضايق ما تضيق قناته
ولا الحر يبقي ع الغراب نزيله ......... ولا عمر حازة الليل دون امباته
ايجنه اعداه ايحوم له تشكيله ......... اطيور الخلا ما يحملن هفاته
لا ياكل الفاسدة ولا الهزيلة ............ عطاه ربنا واجد رفع هاماته
ولجواد تندا ولا تكون نزيلة ............ فعل الصغار م الوجود نفاته
عزومها شداد وتشيلها الثقيلة ............ وانجاها الخايف ايطول حماته
و لا تنطقا بلغات قال وقيله .............. لنقل الحجايج عندها ابثباته
والزين هو اللي يلم اخطاء القبيله ....... وديمه افعال الخير هن عاداته