مكالمة الموت

من طرف free boy 2010-09-23, 11:56 pm

السلام عليكم ورحمة الله وبركاته

مكالمة الموت

ترن ترن .. الهاتف الارضي يرن

منى .. الو .ايــــــوة

الخالة .. السلام عليكم الو منى كيف حالك اليوم

منى .. اهو حال الكسااد الحمد لله وكيف حالك انت يا خالتي

الخالة .. الحمد لله وين امك

منى .. اهي في المطبخ ادير في الغداء ..

خيرك خالتي صوتك متغير في حاجة

الخالة .. بالله سلم بنيتي نادي عليها بسرعة ..

حقا بالله ما فيش مكالمة دولية جتكم على تلفونكم

منى .. انا توا كيف نضت من النوم وما نندري

وين التلفون معزوق مش عارفه الحق

الخالة . باهي ناديلي على امك خلي نفهمها شن تراجي بري بسرعة

وضعت منى سماعة الهاتف على الطاولة

لتقفز قفزا الى المطبخ وتنادي باعلى صوتها .. يااااااااام

الام .. خيرك تصيحي . طرشتيني .. خير مصيبتك

منى .. خالتي تبيك على التلفون وراهوووصوتها متغير مش عارف خيرها

الام .. يا لطيف الطف ان شاء الله خير

منى .. مش عارفه ما قتليش

الام عينك على الطنجرة شوفيها ورقي النار على الطاوة

منى .. باهي

الام على سماعة الهاتف .

الام .. ايوة نهارك مبروك

الخالة .. وين المبروك بالله نهار مش عارف اليوم كيف جاي

الام .. بعيد السو شن في خلعتيني

الخالة .. هادى عبد الله اليوم على صبح ربي كلمه صاحبه من بنغازي وقاله

ان ما تردش على التلفونات الدولية

الام .. وعلاش هدا كله شن في ...

الخالة .. خلي نكملك اللطف

الام . ايوة معاك رعشتيني

الخالة .. قالي عبد الله .. انه صاحبه كلمه وقاله ما تردش على أي تلفون دولي بكل

لان في مشعود يدوي بالفصحة ولا مش عارف شني ما تشدي عليا . المهم ما تردي

الام .. دستوووور مشعود وخير مصيبته شن يبي يتصل

الخالة .. وانا شن نندري عليه ما ترديش وخلاص واهو قتلك

الام .. باهي توا نوقظ الصغار

الخالة ايه وقظيهم سلم وخيتي

انا صغاري نحيت منهم تلفوناتهم

ناقصني انا وجع وحرق اعصاب

هي بالسليمة توا نمشي نكمل قضيتي

اغلقت الام السماعة لتجد منى من خلفها وهيا مشدوهة

الام .. تي شن اديري يا مصيبة ماهو قتلك خليك على الطناجر .

تي شن اديري هنا

رن النقال من غرفة مجاورة

همت منى للدهاب اليه لترد عليه لتمسكها الام من يدها

الام .. هاتيه نقالك وما ترديش عليه

منى. علاش يام شن في ....

الام . هاتيه البلى قتلك انا وما تردي عليه .. شن قلت انا

دهبت منى لاحظار النقال وعلامات الضيق بادية عليها

.. رمت الهاتف في يدي امها بعصبية

منى .. اهو خوديه

الام .. وهيا تتفحص الرقم المتصل .. وتتمتم بصوت عالي ..

يا ساتر استر يا ساتر استر

منى.. سالم خوي ما تعرفيش رقمه توا هادي

الام .. من سالم ... ؟؟!!

منى .. خيرك يام حتى ولدك ما تعرفيه

ردت الام على المكالمة

الام .. ايوة سالم

سالم .. يام صباح الخير خيره ما تردوش من بكري وتلفون الارضي مشغول

الام .. كنت نكلم في خالتك شن في

سالم .. يام ما تردوش على أي تلفون دولي

الام ... ايه قتلي خالتك رعشتني شن تعرف ومن قالك

سالم .. توا وقت من قالك راهو قالوا يتصل بيك رقم دولي ويجيك صوت يطرش الودان

وراهو في حالات ماتو منها وقظي بوي والبنات

الام .. يا لطيف الطف حاضر وتوا نكلم حتى العيلة

سالم .هيا منسكر توا واهو اعطيتك علم ما تردوش بكل

الام .. كانك عليا منسكره مرة وحدة التلفون ..

اغلقت الام الهاتف ليرن من جديد لترميه على الارض وتبتعد عليه

استغربت منى من صنيع والدتها

منى .خيرك يام شن في

وانخفضت لتمسك الهاتف المرمي على الارض

الام بكل صوتها .. تي لوحي النعي من ايدك ما تمسيشي

منى .. علاش شن في

الام بصوت مرعوش مختلط بعصبية . ^^%!!##$%^^ ما تسمعيش في الكلام انت

هاتيه التلفون من ايدك

امسكت الام ويدها تهتز وجسمها يرتعش

منى .. تي تلفون خيرك ترعشي مع بعضك

اغلقت الام الهاتف ووضعته في جيبها لتقول

الام .. جيبلي تلفوني بسرعة وسكريه حتى هوا

منى .. شن في قوليلي وخيرك مخضوضة شن قالك سالم

الام . انا قاعدة ما قتلك .. قالك التلفونات وبالدات النقالات يتصلو بيهم

رقم دولي مشعود يسحرهم ويقتلهم في مكانهم فسكري التلفونات

مالنا ومال المشاكل والي يبينا يكلمنا على الارضي

وهو من اول ما جى هالمصيبة ما خلانا نرتاحو

وبري اوقفي على الطناجر خلي نوقظ خالتك والعويلة

..........................